شغلني يا سي في :)

August 8 at 10:22pm

مساء الفل 

رشا ازيك 

يارب تكونى بخير 

مبدئيا كده عاوز اقولك ان شغلك بيعجبنى جدا 

انت حد مجتهد وجميل واكتف كده والدنيا حلوة فـ عينيه 

ربنا يوفقك يارب 

انا ............. مذيع راديو وصحفى حر 

محتاج منك خدمة .. مش عارف هى كبيرة ولا صغيرة

بس هكون مبسوط وممنون ليكى جدا لو عملتهالى 

محتاجك تساعدنى اعمل ( سى فى ) " اعلامى "محترم 

اقدم بيه فـ مكان محترم برضه :D 

اى تفاصيل محتجاها انا تحت امرك 

تقدرى تساعدينى ؟؟ 

الموضوع دا فعلا مهم جدا.... بص يا سيدي ... الموضوع يستدعي من سيادتك فعل التالي ...

1.   سجل ديمو لشغلك الإذاعي علي اسطوانه 

2.   ديمو برضه من الاخبار الي عملتها في الصحافة 

3.   تبعتلي السي في بتاعتك اشوفها و تكتب في العنوان عايز اعرف رايك

4.   لما تخلص بتبعت السي في معاها ديمو من الشغل بتاعك علشان يدعم موقفك 

و بالتوفيق ان شاء الله ....

August 29 at 8:37pm

استاذة رشا 

ديمو للشغل الاذاعى .. اتعمل 

ديمو لشغل الصحافة .. اتعمل 

السيرة الذاتية نفسها مش عارف اعملها بشكل اعلامى 

سؤالى بطريقة اوضح 

هو فيه فرق بين السى فى العادى والسى فى الاعلامى ؟؟ 

ممكن تبعتيلى اى سى فى اعلامى موجود عندك اعمل زيه ؟؟ 

متشكر جدا 

ومنتظرك جدا برضه 

الحقيقة مفيش حاجه اسمها شكر او نموذج للسي في .... لان هي ليها اشكال كتير جدا لا حصر لها ... و تختلف بأختلاف الوظيفة طبعا ... مش من حيث الشكل و لكن من حيث المضمون ... لاننا دائما بنركز علي رساله معينه عايزين نوصلها لقاريء السي في ... يعني مثلا لو هشتغل في المبيعات .. لازم اركز في معاراتي علي قدرتي علي الاقناع ... و في الخبرات لازم ادعم موقفي باحصائات يعني كنت بحقق نسب عالية ... و هكذا حسب الوظيفة ... و حسب انا عايز الي يقراء السي في دي ... يعرف عني ايه؟؟؟؟

بالنسبة للنماذج ... الصور التالية افتكر ممكن تساعدك شوية

انا هعرضهم بالترتيب من أول ما افتح word  لعمل سي في ...

هتلاحظ ان فيه نماذج كتير جدا اختار منها الي يناسبك ...

واصل القراءة

فريش فريش يعني ...

انا لسة متخرج طازة (هندسة اتصلات) و ياريت حد يدلنى ادور على شغل ازاى ..انا دخلت على كزا موقع و بصراحة تهت ومش عارف ادور ازاى ..و بالنسبة للكورسات محتار جدا كل ماجى اخد كورس ناس تئولى دا غالى و ممكن متحتاجوش فى مجال الشغل انت دور على شغل و بعدين شوف الكورسات اللى تسعدك

طيب ايه رأيك لو درسنا السوق و عرفنا أحتياجاته و السوق محتاج لوظائف ايه وكمان ايه الكورسات الي تؤهلني لذلك ؟؟؟؟؟

انا مش متفقه مع مبدا انك اشتغل الاول و بعدين خد كورسات ... يعني انت متخرج جديد و السوق بيحتاج لناس عندها خبره ... مش كده؟؟؟

مهو انا كشركة مش هعينك عندي غير لو كان فيه استفاده هتيجي من وراك .... يعني خبره سابقة أو علم ؟؟؟؟ و العلم هيجي من الدراسة و الكورسات و الخبره هتيجي من الشغل .... ها هتختار ايه؟؟؟؟ تسمع كلام الناس و لا تبتدي تدور علي احتياجات السوق؟؟؟؟

و طبعا قبل ما تسألني هتعرف السوق محتاج ايه منين ... بسيطه جدا ...

هتجمع عينة عشوائية من الشركات ... و تتصل تسأل عن مسئول الموارد البشرية ... و تقول انا فلان ... وبعمل بحث عن احتياجات السوق و كنت عايز اعرف انتو بتختارو الناس الي تشتغل علي اساس ايه؟؟؟؟ و ايه الكورسات الي بتفضل وان الواحد يكون واخدها ؟؟؟؟ وطبعا تختار الشركات الي فيها المجال بتاعك .. و ربنا معا كان شاء الله..

واصل القراءة

اتعب و أستني .... و لا تنام و تتهني

أنا كنت عايزة اقولك انى زهقانة اوى من نفسى حاسة انى ماليش لازمة مش حابة 

شغلى ومش عارفة اغيرة .

حاسة انى انا كمان عايزة اتغير عايزة اغير حاجات فيا بحب اوى الخشب والديكور 

والفخار والحاجات دية بس عمرى ماحاولت اعمل حاجة تخالينى اشتغل فى كدة مع 

انى نفسى اوى عايزة تغير شامل كامل ليا .

يمكن عاندى فى البيت فى تشدد شوية فى مواعيد الكورسات واماكنها عشان كدة كان 

بيبقى صعب بس انا عاندى استعداد اعمل حاجات كتيير وكمان انا عاندى ازمة نفسية 

كدة من موضوع حصلى فعايزة اشغل نفسى اوى واعمل حاجات كتييير اوى واحس من 

جوايا انى حاجة كويسة مش مجرد انى اتخرجت واشتغلت شغلانة كدة وخلاص.

 عايزة اروح عندك فى خطوات بس مش عارفة اروح لمين ولا اقولوهم انا عايزة اية 

فقولت ممكن تساعدينى انى افهم اعمل اية معلش انى 

انى طولت عاليكى ومعلش على كل الرغى دة

مش عارفه اقولك ايه

بس الحقيقه انا معنديش علاقه بخطوات ... أنا بس بروح لما بيكون عندي كورس او 

تدريب ....

بالنسبة للتغير ... انا من مشجعي التغيير جدا خاصة انه لطيف بين الحين و الاخر 

الواحد فعلا بيحتاج انه يعيد حساباته مع نفسه و يحسن و يطور يعني انا اشجعك جدا 

علي الخطوة دي لكن ....

 بشرط

و شرط هام جدا ... ان التغيير ميبقاش علي حساب نفسك... يعني الي فات مات و احنا 

ولاد انهارده ... غلطنا و عكينا و فكرنا غلط و ضيعنا وقت ... كل دا عادي و انتهي 

خلاص صفحة اتقفلت ... يعني نقطه و من أول السطر و الي فات نتعلم منه مش 

نحاسب نفسنا حساب الملكين ... فهمتيني؟؟؟؟

بالنسبة للهوايات ... ابتدي ... حتي و ان كان علي نطاق بسيط و بعدين نتوسع و 

ننتشر و نقتل :)

بصي مفيش حد في الدنيا ملوش لزمة ... لو ملكيش لزمة مكنش ربنا خلقك ...يعني 

وجودك في الحياه ليه سبب يمكن بس انتي مش واخده بالك منه لكن انتي لكي دور و 

دور مؤثر كمان .... ركزي بس في الحياه حواليكي و هتعرفي الدور دا ايه بالظبط ...

بالنسبة لمواعيد الكورسات ... مش لازم تاخدي كورسات في مكان بعيد و مش لازم 

تكون متأخرة ... يعني ظبطي ظروفك ...

انا شايفه انك ممكن تروحي اي جمعية اهليه قريبه منك و تشوفي ايه الانشطه الي 

عندهم او لو مشتركة في نادي ...او ساقية الصاوي او قصور الثقافة .... الي يسأل 

ميتوهش ... و ان شاء الله تنولي الي انتي عايزاه

واصل القراءة

تجربة احد اعضاء الجروب ....هايله

السلام عليكم ورحمة الله وبركاته.... شكرا رشا... أسمحيلى انقل تجربتى لما كنت بدور على شغل ..انا كنت حكتب الرسالة دى فى الكومنت بس قلت ربما تحرقلك التسلسل اللى انتى عملاه للحلقات... ففضلت ابعتهالك رسالة وتشوفيها لو ماكنتش حتأثر انقليها... بعد اذنك.. للشباب

أنا خريج كلية هندسة ... أول ما أتخرجت طبعا المفروض اعمل السى فى..

طب  هى ايه مكونات السى فى ... يعنى ازاى اعمل  السى فى..طبعا شغلت ذكائى الخارق واتصلت بأحد أصدقائى "مهندس خبرة 7 سنين" وطلبت منه انه يتعتلى السى فى بتعاعته ... اول مافتحت السى فى .... كانت ضلمة.. تقريبا انا معرفتش فى السى فى غير المعلومات الشخصية... والباقى بيتكلم على الخبرة اللى اكتسبها خلال السبع سنين.... قفلت السى فى... وقلت لا لازم اعمل سى فى.

قلت افتح ملف ورد أكتب فيه اى حاجة أنا عرفها من خلال الكلية سواء ليها لازمة او ملهاش ...بعد اربع ساعات من العمل المتواصل استطعت انى اعمل سى فى والحمد لله من صفحة ونصف!!!!!! وبدات ابعتها لاصدقائى مش للشركات عشان يقولوا رايهم فيها.. من خلال تعليقات اصدقائى عدلت فى السى فى وعملت سى فى محترم بدات ابعت للشركات بيه.

انا اصلا من خارج القاهرة ..انا خريج هندسة بتقدير عام جيد جدا..كنت بعتقد ... انى اول ما حوصل القاهرة الشركات حتتخانق عليه ويقولولى فينك احنا مستنينك من زمان... بس للاسف 4 شهور من البحث ياسادة باستخدام جميع وسائل البحث المرغوب فيها وغير المرغوب حتى اتى امر الله والحمد لله اشتغلت فى شغلانه كتير من زملائى بيحسدونى عليها...الحمد لله

طب بالنسبة لحديثى التخرج المفروض يعملوا اية...

- طبق المثل اللى بيقول الزن على الودان أمر من السحر " بس فى حدود المعقول"

- أبعت لجميع الشركات والوظائف المعلن عنها فى الجرايد سواء مطلوب خبرة او غير مطلوب... حتقلى خبرة ازاى .. بص ياسيدى اى شركة بتعين حد جديد سواء خبرة او لا بتعمله تدريب شهر او ثلاث شهور حسب الشركة. يعنى انت لو حديث تخرج وعندك background كويسه ممكن يشغلك ... ليه؟ ..لانى الراجل الخبرة بياخد فلوس على سنوات الخبرة ...يعنى بمرتب واحد خبرة ممكن الشركة تعين اتنين حديث تخرج.. تقريبا اصدقائى تعينه عن الطريق ده.

- الصدق منجاة ... التزم الصدق فى عمل السى فى .. اكتب كل حاجة انت عرفها  وتكون عرفها بجد .. لانى اغلب المقابلات كانت بتسأل فى الحاجات اللى انت كتبها فى السى فى ... لدرجة واحد كان بيسال فى كل كلمة انا كتبها فى السى فى.

- استخدم ذكائك فى عمل السى فى نفترض حضرتك رايح تقدم فى شركة شغالة فى مجال الاتصالات ... شركات الاتصالات نوعين شركات شبكات وشركات موبايل.. طبعا فى الكلية يتتدرس الاتنين بس انت ممكن تاخد دورات فى احد المجالين حسب اهتمامك. طبعا لازم تعرف الشركة دى شغالة فى الموبايل ولا الشبكات اذا كانت شغالة فى الموبايل مينفعش انك تقدملهم سى فى تدل على انك عبقرى فى الشبكات وجاهل موبايل لازم تعكس .. و قدم سى فى تدل على انك الانسب للمكان ده.

-         استخدم yellow pages website فى البحث عن شركات... تقريبا معظم شركات مصر عليه.

-         اكتب subject  للايميل بتاعك. مثلا  job seeker او job hunter.

طب  بالنسبة للناس الخبرة.

كانت اغلب الشكوى من الشخص اللى كان يعملى المقابلة HR""  انهم بيتنقله فى الشركات فى فترات قصيرة.

او ان الشخص كان شغال فى مجال بعد فترة ساب المجال ده واشتغل فى مجال تانى وكل فترة شغال يغير .... لا ياعم حاسب... هو مجال واحد من اول ماتمسك فيها لحد ماتموت.

بس بعد دا كله العملية عملية ارزاق... توكل على الله وانظر الى النبى صلى الله عليه وسلم وهو ويحث الامة للتوكل على الله  

عن عمر بن الخطاب عن النبي قال: « لو أنكم تتوكلون على الله حق توكله لرزقكم كما يرزق الطير، تغدو خماصاً - جياعاً - وتروح بطاناً - شباعاً » [رواه أحمد والترمذي].

وكذلك لابد ان تتقى الله.. قال الله تعالى: (وَمَنْ يَتَّقِ اللَّهَ يَجْعَلْ لَهُ مَخْرَجاً*وَيَرْزُقْهُ مِنْ حَيْثُ لا يَحْتسب (

"سبحان ربك رب العزة عما يصفون وسلام على المرسلين والحمد لله رب العالمين"

أشكرك أختى على هذا المجهود الطيب .. انا لما كنت لسة متخرج كان نفسى حد ينصحنى بس للاسف مكانش فى حد.... جزاكى الله خيرا.

                                                    أخوكى حسن

واصل القراءة

ليلة رمضانية ... وفرقة النيل للفنون الشعبية

في رحلات شبيهة برحلات الفنان الراحل «زكريا الحجاوي» طاف المخرج المسرحي «عبد الرحمن الشافعي» محافظات مصر بطولها وعرضها ليجمع شمل الفرقة الشعبية التي انفرط عقدها برحيل «الحجاوي».

 ورغم صعوبة المهمة فقد نجح فيها «الشافعي» الذي ضم إلي الفرقة عناصر جديدة من فتيات وشباب وأطفال وأطلق عليها اسم «فرقة النيل للفنون الشعبية».

و قد أحيت الفرقة ليلة رمضانية بمدارس طلائع المستقبل تم دعوة أعضاء الجروب للحضور ليلة رمضانية مصرية ... 

13/8/2010

عرض لكل الات الفن الشعبي 

التنورة .... اكثر من رائع

واصل القراءة

في عصر التكنولوجيا و الانترنت ... لسه بنعبي ورق في ملفات ...و عجبي

السلام عليكم ورحمة الله وبركاته كل سنة وحضرتك طيبة وبخير وان شاء الله يكون شهر عتق عليكي مش هطول عليكي انا بشتغل فى شركة توظيف ومن مسئولياتي حفظ او بمعنى ادق تخزين السير الذاتية... ان شايفه ان ممكن نعمل داتا بيز للشركة سفت كوبي لكن كل اللى فى الشركة مقتنعين عشان القوى العاملة والقوانين المصرية لازم نحتفظ بيها هرد كوبي يعنى لازم نطبعه وللاسف انا بجد بتعب جدا فى انى احط كل تخصص فى ملفات... بجد الموضوع بقى فظيع اوي بيهدر وقت ومبالغ طائلة فى الطباعة والورق ده غير مشاكل تخزين الورق والحشرات... 

غير كده بيبقى ظلم اوى للسير الذاتية اللى من كترها ممكن متعرفيش تدورى بسهولة على الشروط المطلوبة فى المرشحين

ان الصراحه الشغل فى المجال ده عجبنى جدا بس السؤال ازاى اتطوره انا بحاول اقنعهم فى الشركة بس المشكلة محدش مقتنع ... والصراحة ان عايزة تصور كامل ازاى اعمل داتا بيز سفت كوبى من غير مااخالف القانون ... ومحتاجه من حضرتك مساعده عشان ابدا فيها لانى مش عارفه ابدا منين عشان يكون مشروع كامل قبل ما اقدمه وحد يكبته من البداية زي ما كل مابحاول كل مره شكرا جدا على وقتك وجزاك الله خير على الجروب ومجهود حضرتك سلام عليكم ورحمة الله وبركاته

مشكلة تواجه كل الناس... بصي المديرين عندهم حق ... احنا لسه معندناش ثقه كامله في التكنولوجيا .. احنا الصغيرين علشان اتربينا علي الكمبيوتر الوضع عندنا مختلف ... و أحينا كثيرة بعزرهم علي فكره ... يعني الدي في دي مثلا تسجلي عليه الحاجه و بعدين يضرب ضاع كل الي انتي سجلتيه ... يعني حتي التكنولوجيا مغشوشة ... يعني تقدري تقوليلي 


كام شركة في مصر بتستخدم نسخ اصلية مش مضروبة ؟؟؟؟؟

طبعا سؤال صعب الأجابه عليه .... !!!!!

فطبعا مش هيقدرو يثقوا في التكنولوجيا دلوقت .... لكن كل مشكله و لها حل ....

بس في الأول خلينا نتفق انتي هتعملي كده علشان توفري علي نفسك المجهود؟؟؟؟؟


 و لا علشان شغلك يطلع حلو و منظم ؟؟؟؟؟

لو علشان توفري علي نفسك المجهود .... مفتكرش اني اقدر اساعدك .... لكن لو عايزه شغل علي ميه بيضا زي ما بيقولو ... يبقي هتعملي التالي ....

1-     جوجل عامل حاجه جامده جدا أنا شخصيا بستخدمها ,.... انك ممكن تعملي قاعدة بيانات اون لاين ... دا لينك الموقع بتاعي  الي بجمع عن طريقها طلبات الجروب للوظائف...  عندك اختيارات ... سواء للوظائف أو للكورسات .. http://www.rashakhalifa.net/ .

2-     الملف دا هيكون مش عندك علي هيئة ملف اكسيل ... فيه خانه فيها الايميل بتاع الباحث عن عمل .... تجمعي كل الايميلات و تبعتيلهم رساله ... تشكريهم علي تسجيلهم معاكي و تطلبي السير ه الذاتية .

3-     لما يبعتو السيره الذاتية بتاعتهم كل الي عليكي انك و انتي بتحفظيها علي الكمبيوتر ... تعملي ليها فولدرات حسب الوظيفة ... و بعدين تطبعي السيره الذاتية كلهم ...

4-     وهتنظمي وقتك خلال اليوم ... يعني الصبح اول ما تروحي المكتب دا بيكون معاد مفيهوش شغل كتير ... يبقي دا وقت الطباعة و حفظ الملفات ... بعد كده تحديد المواعيد مثلا ... يعني الموضوع هيكون محتاج شوية نظيم في الوقت و بعد كده كله هيكون ماشي لوحدة .

بالشكل دا انتي ضربتي عصفورين بحجر ... نفذتي فكرتك و في نفس الوقت عملتي الي صحاب العمل عايزينه ... و دا كده هيكون بمثابة تجربة للفكره .... لو الدنيا مشيت كويسه وكله تمام ... صحاب العمل هيعجبهم الفكره وهيبتدو ينفذوها فعليا ... هي هتحتاج منك مجهود في اول الموضوع و بعد كده كله هيكون تمام ....

رايي انك تنفذي الفكره في الخباثة لحد ما تثبت نجاح و بعد كده تعملي تقرير عن الفتره الي نفذتي فيها الفكره  موضح الوضع قبل و بعد ... 


و بكده تقدري تقنعيهم اسهل ... و ربنا معاكي ان شاء الله:)

واصل القراءة