الاثنين، مارس 12، 2012

كل يوم مهارة ....كل إناء ...ينطح بما فيه!!!!

 
انتو عارفين اني دايما بقول ان المؤسسة ما هي إلا مجتمع صغير .... يشبه المجتمع الكبير الي احنا عايشين فيه .... يعني الموظف في الشركة ما هو إلا نتاج اسرته و تربيته و مجتمعة .... ومن هنا جاء عنوان تدوينه اليوم " كل اناء ينطح بما فيه" الكلام دا كلام صحيح بنسبة كبيرة جدا .... فالإناء الذي امتلأ بالغيرة والحقد وتصيًد السلبيات لا يمكن ان يفيض إلا بكل المشاعر السلبيه مهما حاولت ان تتفاءل بان الاناء بذرة يمكن ان تنبت يوما نبته صالحة .....

 بس علشان انا شخصية متفائلة ... و مقبلة علي الحياة .... بقول اننا برضه لازم نحاول .... و لو فشلنا فيكفينا شرف محاولة الإصلاح :)


خليني اكلمكم عن المواقف الي ... ينطبق عليهم عنوان تدوينه النهاردة ... انا هحكيلكم المواقف عل و عسي ان الناس تتعلم منها وتعرف انها مواقف سنتيحة ملهاش أي 30 لازمة ....

شركة من الشركات الي كنت بشتغل فيها .... كنت ماشيه في الطرقة ... و خير الهم اجعله خير عديت جنب مكتب واحد من المديرين ... وكان مجتمع بموظفة ... و سمعت كلام .... ساعتها بجد حسيت برغبة في البكاء الشديد ....

لان المدير الفاضل ... الي بـ يحاسب الناس الي بتشتغل في ادارته بالورقة و القلم .... و الدقيقه الي بتعدي بدون عمل .... بـ يحاسبهم عليها حساب الملكين .... ضيع من وقته حوالي نص ساعة .... بـ يتكلم فيهم مع الموظفة .... و هاتك يا كلام ... في اخلاق فلانة ... وتصرفات علانة ... المصيبة ان كله كلام في عرض بنات و ستات متزوجات .... متكلمش عن شغلهم ولا سأل هم بيشتغلوا ازاي ولا بيعملوا ايه ؟؟؟؟ الكارثة ان المؤسسة دي ليها ميثاق اخلاقي ... و المفروض انه يكون اول الناس الي تطبق هذا الميثاق ....

مش بقول " كل إناء ينطح بما فيه" ....

عارفين اغنية إليسا ....مصدومة بجد و مش بنطق ...مش عارفه ارد ... مصدومة عشان شكله في عيني بقي مش ولا بد .....
دا بالضبط الي حصلي ساعتها ...

لما رحت مكتبي و اتكلمت مع احد المقربين ليا في الموضوع .... قالي ان دا تصرف عادي جدا بـ يحصل كل يوم ... و ان الناس معندهاش  غير سيرة الناس التانيين ....

معنديش كلام تاني اقولوا ... غير ارجوكم ركزوا في شغلكم ....

وأسأل كل مدير مؤسسة كبير .... أرجوك احسن اختيار المشرفين والمديرين وأحرص علي ان يتحلوا بمكارم الأخلاق ... علشان عرض الناس مش لعبة ... ولا اسلوب المنافسة الي مش نضيف ... ينفع ينجح مؤسسة ابدا ....

بالنسبة للمدير الي انا سمعت كلامه .... اتمني من الله انه يعرف نفسة .... و اتمني اكثر انه يشتغل علي عقده النفسية ... علشان المشرحة مش ناقصه قتلة ... و بعدين بدل ما انت قاعد فاضي تجيب في سيرة الناس ...اعمل حاجه تفيد بيها فريق العمل الي بيشتغل معاك.. ووبعدين لما تاقف بين يدي ربنا هتقولوا ايه ؟؟؟؟؟

أما الموظفة المصونة .... الي سيرة زمايلها لبانه في بقها .... اتقي الله في سمعة زملائك .... علشان علي فكره الناس برضه بـ تتكلم عليكي كتير خالص ... علشان اسلوب كلامك الناعم ... و الدلع الي في طريقتك ...

فيه كمان موظفين يا حرام غير قادرين علي المنافسة الشريفة .... فـ بيستخدموا اساليب " مش نظيفة زيهم " ... احب اقولهم خلوا عندكو دم باه ... 

Reactions:

3 التعليقات:

إرسال تعليق