كل يوم مهارة ....ابعتلي شكرا...!!!!!!!

لما بنتكلم عن الأتيكيت ... أول حاجه بتيجي في زهننا الملابس السينيه والبرفانات الفرنساوي الي ريحتها تجيب آخر الشارع و 

العربيات ال 7 متر .... تفتكر  شويكار مع فؤاد المهندس في مسرحية سيدتي الجميلة ...

لكن لو أتكلمنا عن الأتيكيت في العمل ... فهو ببساطه شديدة جدا مجموعة من السلوكيات لو الموظف قام بإتباعها تحسن من صورته

 وبالتالي هـ يحصل تحسن في الصورة العامة للمؤسسة أو الشركة

كان ليا مدير زمان ليه مقوله شهيرة جدا     " الإدارة شياكة و إتيكيت " كانت وجهة نظره آن الفن في التعامل مع الناس هو أساس

 الإدارة الناجحة .... يعني كلما كنت أكثر شياكة و لباقة وحسن معاملة ... كلما كنت موظف أفضل ...

الحقيقة الموظف لازم يأخذ باله من الحجات الصغيرة دي .... زى طريقة لبسه، طريقه كلامه، طريقة رده علي التليفون .... الخ

النهاردة أنا جايه أكلمكم عن إتيكيت البريد الإلكتروني Etiquette E-Mail  

هو فيه كام نصيحة كده علي ما قسم ...

أولا ... السرعة في الأداء

طالما حد بعتلك رسالة علي البريد الإلكتروني دا معناه بمنتهي البساطة انه محتاج منك ترد في أسرع وقت ممكن، لان أصلا طبيعة البريد الإلكتروني سريعة فمهم جدا السرعة في الأداء ... سرعة في الأداء ...بس بالعقل :)

ثانيا ... استخدم BCC

لما أجي أبعت رسائل لعدد كبير من الناس وخاصة في حالة الناس الي متعرفش بعضها اكتب عناوين البريد الالكتروني بتاعتهم في خانة ال BCC الي معناها " Blind carbon copy" يعني النسخة المختفية أو العمياء ... ودي ممكن أحط فيها أي عدد من الأيميلات مع بعضها ومستقبل الرسالة مش هيشوف باقي العناوين الي تم إرسال الرسالة ليها ... كمان بتكون حاجه سخيفة جدا أن البريد الإلكتروني الشخصي يكون مشاع كده ...

ثالثا .... الجواب بيبان من عنوانه

دا معناه آن في خانة العنوان لازم تكون معبره عن موضوع الرسالة وإلا ممكن مستقبل الرسالة ميديلهاش اهتمام أصلا أو يعتبرها رسائل دعاية أو لا يشعر بأهميتها ف ميفتحهاش أساسا ... نفهم من كده إن مصير الرسالة مرتبط بشكل كبير جدا بالعنوان ... ولك حرية الاختيار ...عايز المستقبل يفتح الرسالة احطله عنوان يدل عن موضوع الرسالة .... عايز مصير الرسالة سله المهملات ... انت عارف تعمل إيه مش محتاج إني أقول :)

رابعا ....خير الكلام ما قل و دل ...

يعني هات من الأخر يلاش الرغي و الت والعجن الكثير .... خش في الموضوع من غير لف ودوران واختصر خلي مضمون الرسالة قصير وفي نفس الوقت فعال

خامسا .... فكر قبل ما تدوس SEND

خلاص كتبت الرسالة قبل ما تدوس علي زر ال SEDND أدي نفسك دقيقتين تراجع فيهم محتوي الرسالة ... أحب أقولك إن الي بيبعت أيميل ... مينفعش يرجع فيه .... فخد بالك وركز كده قبل ما تبعت رسالة لحد ...

سادسا .... اجمع البيض في سلة واحدة

يعني لما تبعت رسالة والرسالة دي يكون فيها أكثر من مرفق ... عليك وعلي برامج  ZIP الي هـ تجمعلك كل الملفات الي انت عايز ترسلها في ملف واحد وبكده هـ أتأكد إن مستقبل الرسالة تقوم بتحميل كل المستندات و مش هينسي ولا ملف ...

سابعا .... اكتب بمزاج عالي :)

يعني لو مودك وحش ... متنرفز .... أعصابك تعبانه ... اجل كتابة الرسائل إلي وقت آخر لما تهدي شوية ..علشان دا هـ يبان في أسلوبك و انت تكتب الرسالة صحيح إن مستقبل الرسالة مش سامع صوتك ولا شايف تعبيرات وشك لكن مودك بيبان في الرسالة ...

كمان لو بكتب رسالة بالانجليزي .... عيب جدا أني اكتب بحروف كابيتال لان دا معناه إني بزعق أو بتكلم بحده ... ناخذ بالنا

ثامنا .....أنا مين؟؟؟؟

التوقيع دا حاجه أساسية لازم التوقيع يبان فيه  اسمي ووظيفتي واسم الشركة وأرقام التليفون لو لزم الأمر مش لازم أضع رقم الموبايل الخاص بي ... لكن لو أنا شايف إن دا مهم أضع رقم الموبايل مش هيجري حاجه يعني :(

الكلام عن البريد الالكتروني مـ بيخلصش ... خاصة أن التكنولوجيا في تطور مستمر وسريع جدا لذلك فنحن مطالبين دائما بالإطلاع علي كل جديد لان ذلك يساعدنا في استخدام البريد الالكتروني بطريقة أكثر فاعلية  ...

علي فكره إحنا مكملين مع الأتيكيت ... انتظروا باقي المقالات ....