27 فبراير 2012
 |
| اطفال ذاكر معانا .... في معبد حتشيبسوت |
بكتب النهاردة من الأقصر ...
من حوالي 8 سنين كانت اخر مره اجي فيها الأقصر و اسوان .... كنت رايحة
في شغل كالعادة تقريبا محكوم عليا مسافرش الاقصر او اسوان غير في شغل :) كنت
مسافرة لوحدي ...12 ساعة في القطار ساعتها مكنش ورايا حاجه غير اني اراقب مخاليق
ربنا الي راكبين معايا ... وقبل كل محطه اقعد افكر يا تري مين هينزل و مين هيكمل
؟؟؟؟
ولما تيجي المحطه .... اقعد افكر يا تري مين الي ركب جديد ....
ساعتها كانت مسيطره عليا جدا فكره ان الحياه ... ماهي إلا قطار كبير
بيقف في محطات ...
وكل بني ادم لما بتيجي محطته ...بينزل
و غيره لما بتيجي محطته ....بيركب
مش بقول حياه ....
لما ركبت القطار بعد 8 سنين في نفس المشوار افتكرت نفس القصة ...
بس المره دي مكنتش بشوف وشوش متغيره بتغيير المحطات .... لان كل الي
ركبوا معايا .... هينزلوا معايا برضه في نفس المحطة...
بس خليني احكيلكم انا شفت ايه؟؟؟؟
علي اساس ان الي في قلبي .... علي مدونتي ...
شفت سعادة الي اول مره في حياته يركب قطار ...
شفت الي مش مصدق انه هيشوف الاقصر و اسوان الي مش هـ يشوفوها غير في الافلام ....
شفت اطفال مش عارفه تنام من فرحتها ....
شفت سعادة .... مشفتهاش في حياتي بجد ....
سعيده اوي اني قدرت اعمل حاجه افرح بيها الناس ... دعواتكم
طبعا الفضول يقتلكم عايزين تعرفوا انا في الاقصر بعمل ايه ....
انا في الاقصر مع " ذاكر معانا " ... ميرسي للاغاثة الإسلامية :)
يا ريتكم تشاركو معانا .... في ذاكر معانا
1 التعليقات:
thank you islamic relief for make the children smile
إرسال تعليق