الاثنين، أبريل 02، 2012

عزيزي الموظف الملطشة ......



العادي بتاع أي موظف انه يتعرض لمواقف اسخف من السخافة كل يوم ...

مواقف مع زمايلة المقربين .... مواقف مع زمايلة الي مش مقربين ... مواقف مع مديرة ... مواقف مع العملاء الي بيتعامل معا هم ... وفي نهاية اليوم بيكون الموظف مثال حي لأغنية الفنان ريكو " طهقان ... زهقان .... متضايق "

الحقيقة المواقف دي عامله كده زى السلاح ذو حدين .... احيانا بيكون الموظف فعلا مظلوم وفعلا ليه حق .... و احيانا ثانية بيكون الموظف عايز يتولع فيه من تصرفاته الي ملهاش أي 30 لازمة....

خلينا ندردش في الموضوع و نتكلم عن المواقف الي بتمر بينا كل يوم .... و نبص عليها من بره الصورة ... يمكن نقدر نفهمها بشكل احسن ونوصل لحل يرضي جميع الأطراف ....!!!!!

مواقف الموظفين مع زملائهم  ما اكثرها .... يعني زميلي الي يدين زمبه و زميلي الي يلقح عليا بالكلام وزميلي الثاني الي يتكلم عليا من ورايا ... و الي بـ يتدخل في ما لا يعنيه في حياتي ...الخ.

المواقف دي انا يشوف انها مواقف عادية جدا ... مش هـ قدر اقول مـ تزعلش منها لان دا كلام غير منطقي انا نفسي لما بيحصل معايا موقف من زميلي بزعل جدا .... بس الفكره اني مش بزعل كتير ...

المفروض اننا نكون علي مستوي من الحرفيه بحيث ان المواقف الي بتحصل اثناء يوم العمل .... لا تختلط بالشخصية ... بمعني اني زعلت من زميلي في موضوع يخص الشغل .... دا لا يؤثر علي علاقتي الشخصية بيه .... لان في الاخر دا شغل ولازم نختلف لان كل واحد اكيد ليه تصور تاني خالص ... فخلينا نفصل بين مشاعرنا الشخصية ... و بين مشاعرنا الناتجة عن مشاكل العمل :) حاول مش هـ تخسر حاجه ....

احيانا الموظف يتعامل ببساطه مع الناس الي اقل منه في المستوي الوظيفي زى السائقين وعاملين البوفيه وموظف الأمن ... الي بيحصل ان مع بساطة التعامل شلنا الحواجز وبقينا نتعامل عادي ... بس يا سيدي وبقي الموظف ملطشة  ... يعني مثلا لو كلم السواق يقولون اعمل حاجه ولا يطلب فنجان قهوة و هو مشغول من غير ما يقول صباح الخير تقوم الدنيا و متقعدش .... و يحصل لت و عجن ... يا اعوز بالله ...ولا لو طلبت منهم حاجه متخلص من التبريرات واصل و فصل .... طب دول اعمل معا هم ايه ؟؟؟؟

دول يا سيدي ... مفيش غير انك تتعامل بأدب ...لكن في نفس الوقت تضع حدود .... ما هو برضه العين مش المفروض تعلي عن الحاجب ... و الكلام دا بقولوا للمديرين الي بـ تشغل الفئة دي من الناس علي انهم طابور خامس ...لنقل الاخبار ... لان يا سيدي المدير احب اعرفك ان السائق ولا الأوفيس بوي ولا عامل الأمن مش هو الي بـ يقيم الموظف .... امال انت تعمل ايه ؟؟؟

اما بالنسبة للمواقف الي بتحصل مع مديرك .... فخلينا نكون عادلين في مناقشتها ... احيانا بيكون المدير فعلا عنده حق خاصة لو كان زى المدير الي يشرح الموضوع و يفهمك ويحاول يقف جنبك ... و تكون النتيجة ان مهاما تعلم في المتبلم يصبح ناسي .... دي حاجه تحرق الدم الحقيقة ... الواحد المفروض يكون حريص علي مستقبلة و مش مقضيها فهلوة ... عزيزي الموظف ... " الفهلوة ممكن تأكل عيش ...لكن عمرها ما تبني مستقبل مهني صحيح "

احيانا بيكون المدير مستفز و سنتيح و خنيق و مصاب بكافة العلل النفسية ودا الله يكون في عون الموظفين الي بـ تتعامل معاه ... يعني مثلا يخش عليك المدير الصبح يقولك وريني الكمبيوتر انا عرفت " انك بتدخل علي مواقع إباحية  " هار اسوك ... يا عم دا انا بصلي وعارف ربنا ... يقولك لاااااااااااااا انا عارف كل حاجه ... انا ممكن اعرف انت بتفتح مواقع ايه .... طبعا هـ يخش علي سجل المواقع ... الكبسه انه وجد مواقع عاديه جدا ... مـ نابوش غير ان الموظف كرهوا و كره اليوم الي اشتغل فيه معاه ....

او مثلا انه قاعد طول النهار يتصيد الأخطاء للموظفين... مستني امتي هتغلط  ....  التدخل في شئون الاخرين بشكل مستفز ... أو يتهمك دايما انك تعرقل سير العمل ... او انك بطيء و مش بتشتغل كويس .... علي اساس ان هو مدير سوبر مان يعني ...

طبعا التعامل مع النوعية دي من المديرين يستلزم كثير و كثير ثم كثير من الحرص.... والتعامل معاه يكون بالورقة و القلم واكون مركز جدا في شغلي ... و اهو المثل بيقول....... امشي عدل يا موظف .... يحتار مديرك فيك ..... مش كده برضه ... 

0 التعليقات:

إرسال تعليق