الأربعاء، يناير 25، 2012

متبصليش بعين رضيه .... شوف الي أتدفع فيا !!!!


و انت ماشي في الشارع تلاقي العربيات الكبيرة وسواقين الميكروباص والتاكسي وحتي التوكتوك ... كاتبين جمل زى " متبصليش بعين رضية .. شوف الي اندفع فيا " أو " يا ناس يا شر كفاية قرر " .. أو " العين أصابتني و رب العرش نجاني " ... كل الجمل دي علشان تبعد عين الحسود ... دا غير الخرزة الزرقاء وفرده الحزمة المتعلقة في آخر العربية مش عارفه فردة الحزمة الصغيرة هتعمل 
إيه لطرد الحسد ... لكن ما علينا

الحسد معروف و مذكور في كل مكان ... الشغل كمان فيه حسد وغيرة ... مهي المؤسسة يا جماعة ما هي إلا مجتمع صغير فيه كل حاجه موجودة في المجتمع الكبير الي إحنا عايشين فيه ...
ثقافات واتجاهات مختلفة ... تربية ونشأة برضة مختلفة ... وقدرنا إننا نتكيف و نتعايش معها زى ما نتكيف و نتعايش مع المجتمع الكبير ... المشكلة إن مكان الشغل بيكون التعايش فيه أصعب شوية دا نتيجة إن الواحد بيشوف زمايله أكثر ما بيشوف أهله و جيرانه فالضغوط بتكون مكثفه أكثر والحسد و الغيرة كمان بتكون أكثر ودا شيء طبيعي.

أنا شخصيا علي الرغم من إني رشا بتاعت التصايح والموضوع دا لعبتي ... و ياما بتمر عليا أسئلة القراء و أجاوب بمنتهي ضبط النفس إلا أني بتأثر بالحجات دي ... لاني في النهاية إنسانه لحم ودم ومشاعر .. فقلت لازم أتكلم في الموضوع دا ...

وودي الن .. دا ممثل و مخرج وكاتب سيناريو أمريكي ... أنا بحس انه زى دريد لحام عندنا ... وودي ببقول "
“People don't hate you for your weaknesses, they hate you for your strengths.”
 يعني الناس مش بتكرهك بسبب نقاط ضعفك .. الناس بتكرهك علشان نقاط قوتك ... معني الكلام دا انك طالما ناجح في شغلك ...حتما ولازما و لا بد ... أن الناس تكون مش طايقاق و تغير منك وكمان تحاول يشتي الطرق انه تضع العقبات في طريقك ...
طب إحنا نتعامل ازاي مع الأمور دي؟؟؟؟؟

النصيحة الأولي ... Never wear your heart on your business-shirt sleeve. 

يعني إيه الكلام دا ؟؟؟؟ يعني اركن قلبك علي جنب ... مشاكل الشغل ... شغل ... متمرش علي قلبي تطبيق النصيحة دي مش سهل أبدا أنا عارفه انه صعب خاصة علينا كمصريين مشاعرنا تتحكم فينا بشكل كبير ... لكن مع الوقت صدقوني بتجيب نتيجة ... بالتعود بتلاقي انك بتزعل شوية وبعدها الأمور بتعدي لأنك اكبر من الموقف ...


النصيحة الثانية .... لا تحكم علي الآخرين ...
يعني افهم أسباب الآخرين ... و إذا عرف السبب بطل العجب و التمس لهم الأعذار... خلينا نتفق أن الغيرة والحسد بيكون نتيجة طبيعية للضعف وعدم الثقة في النفس  ...لان الإنسان القوي مش محتاج يغير منك ... هو ناجح وواثق في نفسه هيحسدك علي إيه يعني !!! علشان كده امشي بمبدأ التمس لأخيك بضعا و سبعون عزرا .... يمكن يخلي عنده دم و يبطل حسد.

النصيحة الثالثة ... نجيب من الأخر و نتكلم بصراحة ...
يعني أتكلم مع الناس الي انت حساس إنهم تسببوا في مشاكل .. امشي بمبدأ اقصر طريق بين نقطتين هو الخط المستقيم ... اسألهم انتو إيه مشكلتكم معايا ... ولما تعرف إيه المشاكل اشتغل علي انك تحلها .... معلش خليك انت الكبير وتعالي علي نفسك علشان المركب تمشي.

النصيحة الرابعة ... لو استلزم الأمر .. غير نفسك ..
يعني لو انت بتتصرف تصرفات تثير غيرة الآخرين نحوك ... بطلها وكفي المؤمنين شر القتال ...

النصيحة الخامسة .... قابل الإساءة بالإحسان ..
كان في مره واحد زميلي كان أخصائي نفسي .. وكنت عماله اشتكي لو همي في المشاكل الي حصل الي رد عليا و قالي يا رشا لو انت ماشيه في الشارع وواحد بلطجي طلع عليك بمطواة ... هتضربيه وتتخانقي معاه ولا هتنسحبي في هدوء .. رديت أن طبعا مش هتخانق معاه لان الخناقة معاه ممكن تعود عليا بالمشاكل ... قالي دا نفس الشيء مع مثيري المشاكل في مجال عملك ... لو انت نزلني لمستواهم أنتي الي هتخسري .. أما لو عاملتيهم بالحسنى الأمور هتنتهي بسلام ...
كل الأديان السماوية ... بطالبنا بأننا نقابل الإساءة بالإحسان ... حتى الناس الي بتعبد النار والقمر هم كمان بيقولو نقابل الإساءة بالإحسان ... خلاص باه نقابل الإساءة بالإحسان و توكالنا علي الله

في النهاية ...افكركم و افكر نفسي ان الشجرة المثمرة هي ما تلقي بحجر ...
 بس بالله عليكم ارموها بحجر لكن رفقا رفقا ... للثمار تخلص :) 
و قبل ما تحسدني .... شوف مهاراتي و امكانياتي ...و اعمل زيي ... قبل ما تبصلي بعين رضية ... شوف الي اتدفع فيا !!!! 

Reactions:

0 التعليقات:

إرسال تعليق