الأحد، يناير 01، 2012

فضفضة سنة 2011


بصفة اننا داخلين كده علي ابواب سنه جديدة .... ان شاء الله تكون احسن من السنة الي فاتت ....

قلت باه افضفض و اطلع الي في قلبي .... انا جبت نفسي ... و عشت عليها دور الدكتور النفساني و قتلها قولي يا حبيبتي مين بس الي مزعلك ؟؟؟؟ فكانت النتيجه 3 ساعات رغي رغي رغي لما دماغي وجعتني منها بس استحملتها مهي نفسي برضه اروح منها فين؟؟؟؟

المهم مش عايزه اطول عليكم ... انا هقولوكم هي قالت ايه ... و انتو احكموا :) ... وطبعا كل لبيب بالاشارة يفهمو ... نبتدي بالناس الي مزعلينها ....


هبتدي بيكي انت؟؟؟ ... انا مش عارفه ليه احيانا كثيرة بحس انك بتغيري مني؟؟؟ علي الرغم ان فيكي حجات كتير جدا احسن مني انا شخصيا في مواقف كتير بتمني اني اتصرف زيك ... علي فكره كون انك تغيري دا معناه انك مش بتثقي في قدراتك وفي نفسك ... يا حبيبتي المسأله مش بالدراع ... الشغل لعب و فن و هندسة ... مش مهم مين المدير علي فكره المهم انك تعملي شغلك صح و هو يتكلم عنك ارجوكي متشتغليش علشان تترقي ولا علشان الناس .... اشتغلي علشان نفسك هتبدعي اكتر ... اقولك علي سر انا مش شايفه انك تنفعي مديرة ناقصك مهارات ادارية كتير جدا ... بس الفرصه قدامك اتعلمي و اتعلمي صح علشان تنجحي اكثر ....

انتي باه .... عقدتيني و كرهتيني في عيشتي من عقدك النفسية .... يا بنتي رفقا بالبشر ... حرام عليكي نفسك بجد مقابلتش حد غير لما كان فيه بينه و بينك مشكله الكارثه باه انك فاكره انك صح ... بلاش تتكلمي علي الناس وحش ... بالله عليك يا شيخة تفكك من مبدا الخوابير والضرب في الظهر الي انت ماشيه بيه دا ...

اما انتي .... بليززززززززززز سيبي التليفون شوية و ركزي في شغلك ... علشان دي مسئولية ... عيب عليكي بعد كل السنين والي اتعلمتيه والخبرات الي خدتيها تتصرفي كده ... الي زيك كان زمانها مديرة و مسئولة ... انت عارفه لو سيبتي التليفون وركزتي في شغلك ولما حد يطلب منك حاجه متنسيهاش ... هتبقي حاجه تانيه خالص ... اشتغلي علي مستوي المؤسسة الي انت فيها انتي مبتشتغليش في سوبر ماركت علي فكره .....

انت باه ... انت بجد شاطر جدا انا اشهدلك بكده .... بس انت متقدرش تشتغل مع فريق ودا عيب فظيع من عيوبك ... مش معني انك شاطر  يبقي الناس كلها اغبية ,... بص يا اسمك ايه ... بطل تظهر في عيوب الاخرين ... الي بيته من زجاج ميغيرهش هدومة في الصالون ... انت محتاج تثق في قدرات الاخرين ... وبلاش اسلوب فرق تسد ... دا اسلوب بيهدم الفريق ... بلاش اسلوبك الهجومي مع بعض الاشخاص ... شوية شوية هتفقد تايدهم ليك و انت الي هتخسر علي فكره مش هم ... خليك فاكر انك شاطر جدا ... بس الشاطر فيه اشطر منه ودا مش عيب .... المهم اننا نصارح نفسنا بعيوبنا ... و نتغلب عليها ...

اما بالنسبة لحضرتك .... انا مش هتكلم لان بصراحة كلامك عني في ان اسلوبي مش عاجبك ... في موقف ملوش اي 30 لازمة حضرتك فقدت تاييد كل الناس ...باسلوبك الي برضه ملوش اي 30 لازمة ... انت ينطبق عليك المثل القائل من يضحك اخيرا يضحك كثيرا ..... انت باه بعبقريتك الي ملهاش حدود ... بعد ما كنت ملبسني الغلط من ساسي لراسي ... زي الباشا بايدك وقعت نفسك في الغلط :) ...

انتي باه ... المفروض انك عشرة عمر ... انا عارفه ان ظروفك صعبة و انك قابلتي كتير في حياتك ... بس دا المفروض انه يخليكي اقوي ... انا اقترح انك تشوفي د / نفساني علي فكره مش عيب ....

انتم باه .... نناويين تفوقو امتي ؟؟؟؟؟ بعد خراب مالطه .... طبعا عارفين نفسكم مش عايزه كلام

نتكلم باه عن الناس اللطيفة ..... هم دول و الله الي مخليني اكمل :) 

نبدأ بيك .... انت الراجل المناسب في المكان المناسب ... بس مع الاسف مع الندم ... في الوقت الغير مناسب ... انا بشكرك علي تشجيعك ليا بجد دا بيخليني اكمل المشوار ... اتمني اكون عند حسن ظنك ... بس انا بقترح انك تقلل شوية من طيبة قلبك لانها مش دايما بتنفع في الزمان دا .... و متستعجلش النتائج ... سيب الامور تستوي علي نار هاديه :)

انتي باه ... بتفكريني بنفسي لما كنت في سنك ... انت شاطره علي فكره مقدرش انكر ... مع شوية تركيز وشوية علم كده هتتظبطي ... انا عارفه ان اولوياتك تتجوزي و تربي العيال ... بس في المرحلة الحالية شوية تركيز هيفيدك :)

و انت كمان .... انا بجد بحبك جدا .... يعني انتي مواقفك وصراحتك الي احيانا بتجيبلي شلل ... بيضحكوني ...بس لما بتنكدي ... يا ستار يا عليم ... ملكيش حل ... ارجوكي لما يكون مودك وحش مش عايزه اشوفك ...

انت بحس انك انجاز بجد ... بحبك جدا ... اوعي تسمعي لكلام اعداء النجاح دول غيرانين منك يا لوزا :)

انتي كمان .... بحب تعاونك معايا ... بس عارفه لو انتي طنشطي اسمه ايه دا ... انتي عارفه طبعا بتكلم عن مين ... هتكون الحياه افضل كتير .... افتكري ان الكلاب تعوي و القافلة تسير ...

انتي كمان .... انا بعتبرك صديقة عمري و انت عارفه انا بحبك قد ايه ... مش تزعلي مني علشان مش بسال عليكي زي الاول ... بس انتي عارفه انا مشغولة قد ايه .. و بعدين انت بعتيني و ابتديتي ال MBA من غيري احنا متفقناش علي كده :) بس هلحقط الترم الجاي دعواتك ....

علي فكره انا بحبكم كلكم .... حتي الي منرفزيني .... بحبهم برضه :) 

Reactions:

0 التعليقات:

إرسال تعليق