الاثنين، يناير 09، 2012

كل يوم مهارة ....هل انت موظف سمكة ؟؟؟؟ ام دجاجة ؟؟؟؟؟


الحكاية ان واحد موظف راح علي مدرة و هو مش طايق نفسه ....  و بيطالب انه يترقي زيه زي باقي زميله الي معاه في نفس المكتب !!!! و طبعا نزل زم في زميلة انه مبيشتغلش ... وانه مبينتجش ... الخ
مديره سال سؤال ....

هو انت موظف سمكة ؟؟؟؟ ولا موظف دجاجه ؟؟؟؟

الموظف سكت شوية .... و اتنرفز اكتر ... هو انا جاي اشتكي ولا جاي علشان حضرتك تتريق عليا؟؟؟؟؟

المدير رد عليه ...يا أخي الدجاه بتبيض كل يوم بيضه ... لكن تفضل تكاكي وتسمع الجيران .. يعني يالي مشفتش شوف .
اما السمكة ... بتبيض كل يوم الاف البيض تحت الصخرة .. ولا من شاف ولا من دري...

علشان كده سألتك ؟؟؟ ومع الاسف طلعت سمكة ...

الموظف خرج يفكر في كلام مديرة ..... وقعد يسال نفسه ازاي دا يحصل ؟؟؟

السؤال المهم باه .... هو الموظف ازاي يبقي دجاجه ؟؟؟؟؟

اقولكم انا ....

الموظف علشان يكون دجاجه المفروض انه يفضح نفسه فضيحة الجزرة في سوق الخضار ... يعني اديها تقارير .... كل ما تعملل حاجه اكتب عنها تقرير علي طول .... متستناش ان حد يطلب منك التقرير عن الحاجه الي تم تنفيذها ... دا مهم جدا لان التقرير هو ال FEED BACK  عن المهمه الي مطلوبة منك او العمل الي اسند ليك ....

وعلشان تكتب تقرير ... حلو بجد ... فيه شوية حجات كده لازم تاخد بالك منها ....

أولا ...حدد الهدف من التقرير ... دي خطوة مهمه جدا ... يعني قبل ما تبتدي تكتب التقرير حدد ايه الهدف العام من التقرير و ايه هي الاهداف الفرعية كمان لو مش متاكد من الهدف ارجع للشخص الي طلب التقرير دا منك و اساله السؤال مش عيب ...هو الهدف من التقرير ايه ؟؟؟؟؟؟؟

ثانية ....فكر في البني الناس الي هتقري التقرير دا ... من الاخر " خاطب الناس علي قدر عقولهم" يعني تراعي مستواهم التعليمي والثقافي .... و بالله عليك بلاش فزلكة وبلاش كلام كبير .

ثالثا ....حدد نوعية المعلومات الي المفروض ان التقرير يتضمنها .

رابعا .....فكر في شكل التقرير ممكن يبقي ازاي ... و الحقيقه ميكرو سوفت مش مخليه حد نفسه في حاجه ... نماذج التقارير اشكال و الوان وعلي كل لون يا بطسطه .

خامسا ....الكتاب بيقول ان عظم التقرير بتتضمن بعض العناصر منها " صفحة العنوان – فهرس – نبذه عن التقرير – مقدمة – متن التقرير – الملخص – التوصيات – اذا كان فيه مصطلحات خاصة او اختصارات " دا بيفكرني بكلام السيد الفاضل " جورج برنارد شو " لما قال
"Tell him what you will tell him, then tell him, and then tell him what you just told him"
يعني المفروض تبتدي الموضوع وتشرح فيه انت هتتكلم عن ايه ؟؟؟ و بعدين تخش في الموضوع بتفاصيلة وفي النهاية خاتمة ظريفة ... تلم الموضوع كله.... علي فكرة مقولة جورج تنطبق علي التقارير المراسلات وكمان لو هعرض موضوع في اجتماع مثلا او اقوم بالقاء كلمة ... الخ.

 فيه تقارير لا تختوي علي كل دا ... زي التقارير اليومية مثلا او الاسبوعية  كمان التقارير الخاصة بمهمه سريعة ... لانها مبتكونش محتاجه كل دا ... بتكون مختصره جدا والمعلومات الي هيتضمنها التقرير اصلا قليله .

سادسا ....خطط ثم خطط و بعدين خطط .... علشان اكتب تقرير كويس لازم اخططله كويس ... الخواجه قال " ساعة من العمل يلزمها يوم من التخطيط" و محدش يسالني اسم الخواجه ايه .؟؟؟؟؟ علشان انا معرفش.

سابعا ....جمع المعلومات .... اول ما تجمع المعلومات علي طول تبتدي تحط العناصر الاساسية للتقرير... وطبعا ترتبهم ترتيب منطقي ...

ثامنا .....التقرير لازم يكون واضح ... و مريح لعين القاريء ....

تاسعا .....مش هوصيك علي مراجعة التقرير مره و اثنين و ثلاثة ... لو فاضي راجعة مره رابعة علشان ميكونش فيه اخطاء لغوية او حتي اخطاء نحوية ...

عاشرا .....اهم حاجه واخر حاجه .... فيه قاعده مهمه اوي لازم نتبعها اثناء كتابة التقرير وهي قاعدة ال 5W وال 1H مين الناس دي ؟؟؟؟ دول ادوات الاستفهام في اللغة الانجليزية ... يعني التقرير لازم وحتما ولا بد يكون مجاوب علي ...
·         موضوع التقرير "What ".
·         مين الي بينفذ و هينفذ لمين " Who "
·         هينفذ فين  " where "
·         هينفذ امتي " When "
·         هينفذ ازاي" How "
·         هينفذ ليه اصلا " Why "

مضطره اسفه اني امشي دلوقت .... لاني لازم اقدم تقرير لمديري ... و متاخره جدا ... الحق ابعته قبل ما اخد لفت نظر


Reactions:

1 التعليقات:

إرسال تعليق