الثلاثاء، يناير 03، 2012

كل يوم مهاره ..... هل انت موظف سنتيح ؟؟؟؟؟؟


في مجال العمل بنقابل كل يوم أنماط مختلفة من الموظفين ... فيه نوعيات من الموظفين بيساعدو بشكل كبير في تطور المؤسسة وفيه نوعيات من الموظفين .... يا ساتر يا رب .... يتفننوا ازاي يهدموا المؤسسة

فيه موقع الكتروني لطيف خالص ... الموقع بيهتم بإدارة الأعمال ... عملوا استقصاء رأي  في يوليو 2011 علي حوالي 66 ألف شركة مؤسسة و يشتغل فيها حوالي 22 آلف موظف كان الهدف الأساسي هو معرفة أنماط الموظفين داخل الموئسات ما هي المشاكل التي يواجهها المديرين مع أنماط الموظفين المختلفة  ..... تخيلوا أن 88% من المديرين ناجحين جدا وذلك بفضل فريق العمل من الموظفين ذوي الأنماط الجيدة ... وان 90% من المديرين يلجأ إلي تسريح أنماط الموظفين المثيرة للمتاعب ...

النماردة أنا جابه أتكلم معاكم في أنماط الموظفين و علشان العدالة و المساواة .... 
هيكون فيه أنماط تحت بند " الموظف الفلة شمعة منورة " وأنماط آخري تحت بند " الموظف السنتيح " لما هتشوفو الأنماط هتعرفوا لوحدكم انهي موظف فلة ... و انهي موظف سنتييييح


 و في الآخر كويز كده علي السريع علشان تعرف بيه HOW BAD OR GOOD YOUR EMPLOYEE  أي خدمة :(  
نمط فيها لا اخقيها ....
النمط دا الحقيقة منتشر بشكل كبير جدا في مصر بالذات ... طبعا كلنا عارفين قصة سيدنا يوسف عليه السلام ... والحكاية الشهيرة بتاعت الملك الي شاف رؤية و طلب من من حوله تفسيرها .... و الساقي اخبره انه يعرف من يفسر الرؤيا .. في القصة الساقي افتكر سيدنا يوسف لكنه لم يخبر الملك علي اسم من سيفسر الرؤيا .... تحس آن دا نمط مصري صميم ... فيها لا أخفيها ... يعني يروح هو يسال سيدنا يوسف و يرجع يقول للملك التفسير ... لفة كده علشان طبعا لازم ينوبه من الحب جانب ... امال يعني يقول للملك دا فيه واحد اسمه يوصف في السجن يفسر لك الرؤيا و يطلع هو من المولد بلا حمص .... طبعا مينفعش ... النمط دا موجود بشكل أساسي في كل المؤسسات و الشركات ... يعني لازم الموظف من دول يحس بقيمته .. ولو اسمني مش مكتوب ... هحطلك 100 عقدة وشنيطه في سكتك ....
النمط دا مش لطيف آخر حاجه ... لأنه طبعا مشاكله كتير .. و علشان كده لازم احطله حدود يشتغل من خلالها ... دا غير آن مهم جدا احسسه آن دوره له كل التقدير و الاحترام في حاله انه ميعقدش الأمور ...لكن لو عقد الأمور و عملي فيها أستاذ .... لازم يعنف و يلفت نظره آن كده مينفعش ... ميصحش خالص  ...
نمط الموظف الزنان ....
دا الموظف الي كل ما يكون ليه طلب ...يا ساتر يا رب علي الزن ...  النمط دا مهم إني اطلعة علي خطة المؤسسة آو خطة فريق العمل حسب وظيفته ...و بالتالي هيفهم آن الأمور مش محتاجة زن علشان أنفذ طلباته .... الموضوع اكبر مني و منه هو كمان .... خاصة آن هذا النوع من الموظفين مرهق  للأعصاب .... واحدة عصبيه زيي ... ممكن النوعية دي تخرج من عندي بعاهة مستديمة ...
نمط الموظف الشكاي ...
دا موظف ليل و نهار و نهار و ليل عمال يشتكي همه من يوم ما ولدته آمه ....  النمط دا زى النمط الي قبله مثير للأعصاب يعني لو بيتعامل مع ثلاجة .. هتقلب فرن في لحظة ....  الموظف دا مفيش حاجه عجباه .... و علشان كده رأيه كأنه مقالهوش ... اعتبره هوا ... كأنه مش موجود ... ول يأخذ برأيه ... لأنه دايما ميعجبوش العجب ولا الصيام في رجب ...
نمط ال BBF "Boss' Best Friend  "
دا النمط الي ماشي ورا المدير ....  و يحب دايما يكون علي علاقة حميمة مع الادرات العليا ... يهتم بيهم دائما ... و يا حرام المديرين مهم بشر لحم و دم يعني ... اكيد طبعا النمط دا يؤثر فيهم ... لكن دا أحيانا كثير ما بيوقع المدير في مشاكل .... و علشان كده المدير لازم ياخد باله جدا من النمط دا ... لأنهم قد يكونون سبب متاعب كثيرة ... أول من يعاني منها هو المدير نفسه .... دا غير آن الموظفين الآخرين طبعا بيكونو مش طايقين اخينا دا ... و لا طايقين المدير هو كمان ....
نمط  حاشر مناخيره في الي ملوش فيه ؟؟؟؟
طبعا دا نمط عارف نفسه ... مش محتاج شرح يعني ... دور المدير باه انه يحطله حدود و يوقفه عند حده .... ملهاش حل تاني.
نمط ملك الإشاعات ....
يعني عامل زى عساكر الدرك بتوع زمان .... يفضل يدور علي الإخبار وطبعا رويتر ... نقل بسرعة ... مننساش انه لازم يدلي بدلوة علي الكلام ....  شوية بهارات و سبايسي ... دا لازم يترفد علي طول " طبعا دي وجهة نظري"
نمط الone  Man Show  
دا نمط خطير جدا .... أنا بسمية نمط لاعب الاسكواش .... ملوش في أي لعبة ثانية ... دا محتاج علاج نفسي فورا ... لأنه غالبا ما بيكون أناني و مبيحبش غير نفسه ... يعني لا يعنيه المؤسسة ولا الشركة ...كل ما يعنيه هو نفسه ... النمط دا مينفعش قائد فريق ولا مدير خالص .... ولازم يفهم آن سبب عدم ترقيه هو عدم تعاونه مع الآخرين .... لان وجوده أحيانا بيكون خطر علي المؤسسة وخاصة لو كان في منصب قيادي ... أنا شخصيا كنت من النمط دا .... بس عقبال عندكم اتعالجت .... أحيانا كده بتجيلي شعرة ... لكن بلحق نفسي ... يحاول دايما افتكر آن دا عيب خطير و لازم بتره ....
نمط مكنة الشغل المتنقلة ....
دا نمط لا يكل و لا يمل من العمل .... 23 ساعة شغال ...  النمط دا علي قد كل مميزاته ...إلا انه أحيانا بيكون سبب المشاكل ... لأنه فيه فرق سرعات بينه و بين من حولة وبالتالي ... طبعا زمايله بتغير منه وبمرور الوقت ممكن يكونون عدائيات ضده .... النمط دا يعتمد عليه جدا لأنه عارف هو بيعمل إيه دا غير انه ينجز كل المهام بسرعة وكفاءة .... مشكلته بس بتكون في أعداء النجاح ... ودول ما أكثرهم ... أنا أفضل آن التعامل مع هذا النمط ... هو إني استغله في نقل خبراته للآخرين و بكده يمكن فريق العمل يخلي عنده دم و يبطل حسد وغيره و يشتغل زى اخينا دا .... بس برضة كمدير أراعي شعور الموظفين الآخرين باني أكون حريص في كلامي عن اخينا دا ...
نمط نكته لكل مواطن ....
دا نمط محبوب من كل الناس ... بشوش و لطيف ... و بيحي كل الناس كمان كل الناس بنحبه
نمط الموظف الاستراتيجي ....
دا موظف عنده رؤية ورسالة في حياته ... دا الموظف الي مجاوب علي 5W و 1H يعني عارف هو بيعمل إيه ؟؟ ليه؟؟ و يعملوا أمتي ؟؟؟ و يعملوا ازاي؟؟؟ و يعملوا فين بالضبط ؟؟؟ و يعملوا ليه ؟؟؟ و كمان عارف مين الي هيساعدو ؟؟؟؟
رجل محدد واضح وصريح ... عنده خطه واضحة وعارف حياته ماشية ازاي؟؟؟؟ .... أي مؤسسة تكون محظوظة لو عنده موظف زى دا ...
الموظف المبدع ....
دا الموظف الي بيعمل من الفسيخ شربات .... مبدع و مفكر و دايما عنده جديد... حدوده في التفكير السماء .... NOTHING CAN STOP HIM  ... دي  مهارة من الممكن اكتسابها علي فكره ...  عارفين أوبريت الكتكوت الأخضر
المشهور ب يا حلولي يا حلولي وده إيه ده اللي بيحصلي ... كل ما بملي في عقلي بكبر بكر سم و ملل... دا بالضبط الي ممكن أي حد يعمله علشان يكون موظف مبدع اقرأ و أتعلم خليك دايما UP TO DATE ... لو عايز مساعدة جوجل موجود :)
الموظف القائد ....
دا دايما بيكون قدوة لكل فريق العمل .... يعرف ازاي يجمع الناس حوالبه ... دا ينفع جدا مدير ...
يا تري ... من انت ؟؟؟؟
لو عايز تعرف انت موظف عامل إيه آو  نوعية الموظفين الي بشتغل معاك ..... جاوب علي الاختبار دا ...
الدرجات من 0 إلي 4 " 0 = لا يوجد ، 1 = نادر الوجود  ، 2 = يوجد بشكل ضعيف جدا ، 3 = يوجد بنسبة كبيرة ، 4 = يوجد بشدة "

السؤال
الدرجة من 0 إلي 4

أولا أسئلة السلوك العام


  1.  
الموظف عنيف في طريقته اسلوبة مع الآخرين


  1.  
الموظف مناكف و متعجرف


  1.  
الموظف يتكلم من وجهة نظر انه عارف كل حاجه ... و أنا لا


  1.  
الموظف مبياخدش أوامر وبضرب بها عرض الحائط


  1.  
الموظف فيه حاجه غلط " نفسيا آو ثقافته " و صعبان عليا مش عايز ارفده


  1.  
الموظف عندي غاوي مريسة ... بيحي دايما يكون رئيس الآخرين


من حيث التخصص


  1.  
كثير الاخطاء وغير منظم دا غير انه مش بيتعلم بسرعة


  1.  
يدعي انه عارف مهارات بعينها لكن في الحقيقة هو مش عارف حاجه


  1.  
موظف عارف كل حاجه ... ويحاول الظهور دائما بمظهر الخبير


  1.  
بطيء جدا


  1.  
كسول


  1.  
مبيقدرش يشتغل تحت ضغط


الأمور الشخصية


  1.  
حساس زيادة عن ألازم


  1.  
بيجي الشغل شايل طاحن سته ... ويؤثر ذلك علي أدائه


  1.  
دايما يدعي انه عيان و مريض


الثقة والصدق


  1.  
كاذب ... يعني يعمل المصيبة و ممكن يتهم بيها غيره


  1.  
غير أمين ...


  1.  
لا يفي بوعده


  1.  
ينسب أفكار الآخرين لنفسه


التواصل


  1.  
يحسسك انه فاهمك و عارف انت بتفكر ازاي ... بس دا غير صحيح أبدا


  1.  
كثير الشكوى ... ومش عاجنه حاجه


  1.  
من الصعب فهمه ... لأنه دايما يستخدم كلمات حرفيه جدا آو انه غامض في كلامه


الأداء الاحترافي


  1.  
يستخدم أدوات المكتب في أغراض شخصية


  1.  
يستخدم المؤسسة لتطوير عمله الخاص آو عمل احد أقاربه


  1.  
لا يقدر علي حفظ سر


  1.  
لا يشارك في أي أنشطه اجتماعية علي مستوي المؤسسة


  1.  
لا يتعامل مع الموظفين الآخرين


آخري .... لو فيه أي أمور آخري انت شايف أنها مش عاجباك ضيفها هنا

  1.  



  1.  



  1.  



  1.  



  1.  



  1.  



  1.  



الإجمالي


من 0 إلي 10 ....
انت موظف جامد جدا ولو هطبق دا علي فريق العمل الي يشتغل معاك ... الفريق جامد جدا ...
من 11 ‘لي 20 ....
انت موظف كويس عندك بس شوية ديفوهات بس ... و نفس الكلام ينطبق علي فريق العمل الي معاك.

من 21 إلي 30
خاف علي نفسك ... هتبتدي تواجه المشاكل مع الموظفين ...بس الفرصه لسه قدامك  اشتغل علي المشاكل الأمور هتكون أفضل
من 31 إلي 39
انت عندك مشكله حقيقة .... لازم تعمل وقفه وتعامل مع الوضع ... ممكن ترفدلك موظف آو اثنين
40 إلي 59
انت محتاج تنسف حمامك القديم .... مفيش حل تاني
60 وما بعده
السفينة تغرق علي فكره .... البس طوق النجاه والحق نفسك

Reactions:

0 التعليقات:

إرسال تعليق