الاثنين، نوفمبر 22، 2010

فكرتيني بالامتحانات

السلام عليكم
فى البداية اشكرك على نصائح رشا وأحب أقول لكي إني استفدت منها ولكن عندي أسئلة وأرجو الرد عليها .
السؤال الأول 
 أنا عملت انترفيو مع شركة تداول الأوراق المالية وكانت الشركة عاملة إعلان في احد الجرائد وكانت طالبة شئون قانونية وإرسال ال CV عبر الإيميل وبعد ماعملت الانترفيو والمقابلة
عدت بسلام قال لى الاستاذ الذى عمل معي الانترفيو لكي مقابلة ثانية Second interview وكلمينا بعد اسبوع اتكلمت وردت السكرتيرة وقلت لها ممكن أكلم الاستاذ (فلان) وهو الذي عمل معي الانترفيو قالت لي  مينفعش يتكلم  ثم قلت لها هل ميعاد الانترفيو الثاني اتحدد قالت السكرتيرة لم يتحدد وإن تحدد سأكلمك ثم قلت لها يعنى أنا اتقبلت ولا لأ قالت لما يبقي يتحدد هبقى اكلمك  فماذا أفعل هل ابعت على نفس الإيميل الذى ارسلت ال CV علية ولا لأ
السؤال الثاني 
  قرأت شغلانة في 10 أيام وحضرتك قولتي يجب أن نكون محددين عايزين نشتغل أية أنا ليسانس حقوق جامعة حلوان متخرجة  2007 فما المجال الذي أقدر ادي فيه مع العلم  شركات كتيرة لاتطلب شئون قانونية فسعات اتصل بشركات تكون طلبة سكرتارية فهل أوافق أم أثبت على مجال المحاماه
السؤال الثالث 
عندما أطلب الشركات للوظيفة  ماهى الصيغة للسؤال عن طلب وظيفة ؟
فكرتيني بأيام الامتحانات ....بس عجبني أوي النظام في طرح الأسئلة ...
بالنسبة للسؤال الأول ... دايما بقول ان الواحد بعد ما يعمل المقابلة الشخصية يطلب من البني ادم الي قابلة الكارت بتاعة ... الكارت هيكون فيه ايميلة وارقام تليفوناته و ارقام الشركة وبالشكل دا هيكون سهل عليا اني اتواصل معاه بسهولة ... ( من غير ما اعدي علي السكرتيرة) دا غير حاجه مهمه كمان و هي اني لازم ابعتله خطاب شكر اشكره فيه عن المقابلة وكلمتين حلوين عن حسن المقابلة لو فيه اي حاجه نسيت اقولها في المقابلة زي خبرات او شهادات اقولها في الخطاب دا... لو الي عملت معاه المقابلة طلع غليس و مدانيش كارت ... و انا خارجه اخد ايميلة من السكرتارية بره .
بالنسبة لحالتك افتكر ان افضل طريقة هي التواصل المباشر لان السكرتيرة مش دايما بتكون عارفه معلومات كفاية ... لو مش معاكي رقمة الشحصي حاولي تبعتيله e-mail .
السؤال الثاني ..... دي مشكلة كل الناس انهم حاصرين نفسهم في اسم الكلية ..يعني حقوق يبقي شئون قانونية ... الموضوع مش كده علي فكره .... شوفي ايه المواد الي كنتي بتدرسيها هتجدي انها مرنه جدا ... يعني ممكن تشتغلي مساعد اداري او موارد بشرية أو شئون عاملين أو في الادارة القانونية أو العلاقات العامة أو ادارة المشروعات اوتقدمي استشارات قانونية عبر الانترنت او شئون ادارية ...الخ
شوفتي كام شغلانة طلعتها من الموضوع :) و علي فكره السكرتارية مش وحشة ... انا شخصيا ابتديت حياتي سكرتيرة ومن السكرتارية اتعلمت حجات كتير و اتدرجت لحد ما وصلت مديرة ...لكن ... لو هتشتغلي سكرتيرة علشان شغلانة و السلام بدون هدف واضح.... ارفض و ارفض بشده ... لازم يكون عندك رؤية و رسالة لنفسك ... يعني هشتغل اي شغلانه و ان كانت بسيطه علشان هتوصلني للي انا عايزه :)
السؤال الثالث ... مفهمتوش ؟؟؟؟ يعني ايه صيغة للسؤال عن طلب وظيفة؟؟؟؟ 
تحياتي 

Reactions:

0 التعليقات:

إرسال تعليق