الأربعاء، نوفمبر 24، 2010

الي فيه عين وراس ....يعمل زي ما عملت الناس

السلام عليكم ورحمه الله وبركاته ،

أزيك يارشا ؟ يارب تكوني بخير

أنا على فكرة من غير زعل يعني حاسة ان كل النصايح والكلام أللي أنتي بتقوليه كلام نظري بس ومابيطبقش خالص في الواقع العملي على الأقل بالنسبة لي ...... وحقولك ليه ؟
علشان أنا خريجة آداب دفعة 2009 بتقدير جيد ومن بعد ما خلصت مباشرة أخدت كورسات تنمية بشرية وكمبيوتر وأنجليزي  لأني كنت عايزة أشتغل شغل أداري كعلاقات عامة أو خدمة عملاء أو سكرتارية  وكمان الحمد لله عندي مهارة  وهي اني سريعة في الكتابة على الكمبيوترولكن للأسف الشديد !!! كل ما أقرأ أعلان في النت أو الجرايد عن وظايف وأروح أتقدم بتقابلني مشكلة أنا ماليش اي زنب فيها وهى أني ماعنديش خبرة !!! أللي بيحصل كالآتي أروح الأنترفيو طبعا بملى في الأول أبليكشن وبيكون في الجزء الخاص بتاع الخبرات فطبعا بسيبه فاضي لأني وللاسف الشديد ما أشتغلتش قبل كده وبعدين أدخل أعمل الأنترفيو فيسألني صاحب العمل عن مؤهلاتي والكورسات وكل حاجة تمام لكن للأسف الشديد يروح باصص طبعا على حته الخبرة ويقولي ايه ده أنتي ما أشتغلتيش قبل كده ؟ أقوله لا يا فندم وأقعد زي ما أنتي قلتي قبل كده أني احاول اسوق نفسي باني أذكر له المهارات والأمكانيات بتاعتي وأني أنا في أسرع وقت ممكن حكون على قد المسؤلية في الوظيفة لكنهم وللأسف بيقعدوا يتريقوا أو يكلموني بأسلوب بايخ عن أنهم عايزين ناس جاهزة ولسه مش حيستنوا حد لغاية لما يفهم طبيعة الشغل غير كده أنهم بيقولولي على مرتبات ضعيفة جدااا كله ده علشان ماعنديش خبره بس أنا والله العظيم لما بيقولولي على أي مرتب ما بتكلمش وبقول ماشي علشان بس نفسي اشتغل ويبقى ليا كيان وهدف في الحياة ، فقوليلي بقى أعمل أيه ؟؟؟؟؟؟؟ علشان خلاص حاسة أني مرفوضه من المجتمع كله وعلى فكره أنا لما بتقدم لأي وظيفة بسأل الأول عايزين خبرات ولا لأ لو قالولي عايزين مش بروح أصلا بس كل المقابلات أللي بقولك عليها دي ويالا العجب بيبقوا طالبين حديثي التخرج !!!!!!! أرجو منكي الأهتمام بمشكاتي وياريت يااريت تقوليلي حلول واقعية وعملية تنفع معايا .

وأشكرك مقدمااااااااا

مممممممممم كلام نظري .... وجهة نظر برضه ... و لازم تحترم ...
أحب اقولك ان كل الي بكتبة انا شخصيا مريت بيه ... و انا عملتة و لما عملته وصلت للي انا عايزاه ... و كانت وجهة نظري  ا نالي فيه عين وراسب يعمل زي ما عملت الناس .... و بناء عليه الي انا قدرت اعمله اي حد تاني يقدر عليه لاني بني ادمة عاديه مش سوبر ومان يعني :)
دا غير اني احبط كتير طبعا .... يعني طريقي مكنش مفروش بسجادة حمرا ... ياما اتحطيت في مواقف بايخة و ياما ناس اتريقت عليا ... عارفه انا مره قدمت في وظيفة ... و كنت عندي 5 سنين خبرة في مؤسسات عالمية و اترفضت ... و لما سألت اترفضت ليه؟؟؟؟ اترد عليا لاني تخينة .... هههههههههه يعني مجرد اني وزني تخين أثر بشكل سلبي علي اني اخد الوظيفة ... ساعتها احبط و مكنتش طايقه نفسي ... لكن كملت ... وبرضه وصلت .. الحمد لله
انتي دورك انك تاخدي الكلام النظري و تحوليه عملي بما يتناسب مع ظروفك و هسألك سؤال ... انت حاطه السي في بتاعتك في شركة توظيف؟؟؟؟ هم يساعدوكي تلاقي شغل .... بتابعي ملتقيات التوظيف و تروحي تقدمي السي في؟؟؟؟؟ متابعة مواقع العمل علي الانترنت ؟؟؟؟؟
البحث عن عمل عايز الواحد يرفع شعار ( لالالالا للاحباط ) ... ( والضربة الي متكسرش بتقوي)
الموضوع عايز ثقة و يقين بان الرزق بيد الله ( علمت ان رزقي لن يأخذه غيري فأرتاح قلبي ) و يقين ان ربنا هيديني علي قد تعبي و اصرار اني اوصل ... بسيطه يعني

Reactions:

0 التعليقات:

إرسال تعليق