خناقشة ..... علي قصة حب.... و عجبي

موزا بعد ما نوفا سرقت منه الفرصة ....اتعلم درس كبير ...وعرف انه بشويه صبر و تكتيك ...هياخد الي بيحلم بيه

نوفا زيها زي اي بنت ...نفسها تحب و تتحب ..و تعيش اللحظة ...
بس نوفا ....عايشه اللحظة بذيادة شويتين ..قول ثلاثه .اربعة ...يمكن خمسة .

فيه نادي حزين في المدينة الي موزا و نوفا عايشين فيها ...و دا الخروجه الوحيده المتاحة ... مع شم النسيم و العالم ألوان ألوان ...قابل موزا نوفا قاعده علي جنب في النادي ..قال يسألها عامله ايه خاصه انه بقاله كتير ميعرفش عنها حاجه ...

هاي يا نوفا عامله ايه ؟؟؟؟؟

تمام الحمد لله ....كله لطيف ...و تليفون نوفا رن....

بترد لقيت مديرها ....نازل خناق ..و خناق ... كان فيه فاكس مهم المفروض حضرتها تبعته .... ومع النكد الي هي معيشه نفسها فيه نسيت ... 

نوفا اصلا مخطوبه لدولي ...و دولي من نوعية الناس الشكاك و الغيور و ما ادراك ما الغيره ...و ما الشك ... نوفا باه من نوعية الستات الزنانة .... طول النهار .... زن زن زن ... لما قفت دولي في عيشته طبعا 

تعب و قرف السنين...طبعا دولي يكلم نوفا الصبح ...يصبحها بخناقة كل يوم ....والغلبانه يا عيني تفضل طول النهار عياط و نواح والموبايل ميفارقش اديها.... زن زن علي دولي علشان يرضي عنها ...طبعا نوفا بقي الاساس انها علي طول بتعيط علشان دولي منكد عليها ...

موزا قالها تصدقي ....صعبتي عليا ....بصي يا نوفا ...

صاحب بالين كداب ....و صاحب ثلاثة ...منافق ...

انا مش هقولك سيبي خطيبك ...مش هقولك متحبيش ...مش هقولك عامليه وحش .......

لكن .... الي انتي بتعمليه دا هيضيع منك خطيبك و شغلك كمان .....

نوفا : طب اعمل ايه يعني ؟؟؟؟؟

1. لما تدخلي المكتب .... اقعدي 10 دقائق رتبي فيهم افكارك و اكتبي كل المهام الي المفروض تنجزيها النهارده.

2. حددي اولوياتك خلال اليوم علشان متنسيش حاجه و مديرك يتصل يزعق.

3. قبل ما تسلمي اي حاجه من شغلك ...لاااااااازم مراجعة ..مره و اثنين و ثلاثه.

4. حددي وقت معين للراحه خلال اليوم ....و دا الوقت الي تردي فيه علي مكالماتك الشخصية.... غير كده دا وقت الشغل مفيش مكالمات شخصية.....

5. الزمي نفسك بتقرير انجازات يومي ...اكتبي فيه كل المهام الي مطلوبه منك والاجراء الي انتي عملتيه والوضع النهائي ايه؟؟؟؟؟؟ بالشكل دا انتي بتابعي نفسك بنفسك ....مش مستنيه حد يعدل عليكي .

6. تسجيل دقيق لكل المعلومات .... و ترتيب ملفاتك أول بأول ....

و بكده مش هتلاقي اصلا وقت تبكي ..و لا تزعلي ...و لا تزني علي خطيبك .... بصي تقريبا هتنسي اسمك ..و تفتكريه بس لما حد يندهلك ....ههههههههههههههههههه

انتبهي لشغلك يا نوفا ...

و بطلي زن ....يا زنانه .....

مين مستني باقي الخناقشات ........أوعي تغمض عنيك :)