الأربعاء، أغسطس 11، 2010

قلتلها يا بنتي خليكي في حالك .... و انتي مالك أصلا





رشا ..
أنا ببعلك علشان انا عندي مشكلة في شغلي و محتاجه اعرف منك حلها ...

انا بشتغل سكرتيرة في مدرسة  ومدير المدرسة بيثق فيا جدا و أمله فيا كبير و شايف اني اقدر احقق حجات كتير جدا ... و فعلا انا بطلع بافكار جديده و بشتغل كتير وبعمل مجهود كبير اوي

كل الي قلتهولك دا مفيهوش اي مشكله ... المشكله في مديرة مكتبه ... طول النهار تخش تنقل ليه كلام و يا ريت بتنقل كلام صح لا دا كله غلط في غلط ... مش عارفه حطاني علي راسها ليه ؟؟؟

دا غير واحده تانيه بتقول عليا كلام برضه و تخيلي كان عندي صاحبتي بقت هي كمان بتتكلم عليا ...
و في يوم المدير بعتلي و عمل معايا اجتماع ... وحصل نقاش بيني و بينه في امور كتير ... و بعد كده طلب مني اني مخرجش اسرار المدرسة بره لانه سمع من واحد موضوع ... محدش يعرفه غيري ... دا غير ان مديرة مكتبه دي الناس بتقول انها علي علاقه بيه .... دي حتي عايزه تفسخ خطوبتها علشانه ...

و مش عارفه اعمل ايه ؟؟؟؟
 ======================================================

الحقيقه انا مش عارفه اقولك ايه ؟؟؟؟
 طبعا انتي متوقعه مني اني اجي في صفك وادعم كلامك علي انك المظلومة الوحيده في القاعدة و ان كل الي حواليكي دول ذئاب بشرية والمدرسة ناس يع يع ...
بس الحقيقه ... انا مش هقول كده ...

انا هقول ان مديرك دا واثق في قدراتك ... و متوقع منك نتايج معينة ... لكن مع الاسف مع الالم ... انتي اشتغلتي كتير وعملتي الي عليكي بنسبة 50% و ضيعتي 50% من مجهودك علي فلانه قالت و فلانه عادت و هم بيتكلموا عليا و هم غيرانين مني علشان انا شايفة شغلي ... و بيتكلموا عليا ....

ثم انتي مالك انتي مديرك علي علاقة بمديرة مكتبه و لا لا؟؟؟؟ هو حر و هي حره ... انتي مش مراته و لا ولية أمره علشان تحاسبية علي تصرفاته .... دا غير و بعيدن مفيش دخان من غير نار ... يعني مفيش حد هيجي يقول عليكي كلمة كده من العدم ... اكيد انتي اديتي الفرصة للناس تتكلم ....

بصي يا بنتي ... ركزي في شغلك الله يرضي عليكي ... و سيبك من الكلام الفارغ الي بيضيع الوقت دا ....

و أعملي الي عليكي ونفذي كل الي مطلوب منك ... و متديش فرصة لحد يتكلم عليكي ...

Reactions:

3 التعليقات:

إرسال تعليق