الاثنين، يناير 03، 2011

كلمتي متنزلش الأرض أبدا ....

النهارده كنت بسمع نجوم أف أم .... كريم الحميدي كان بيسال سؤال جامد جدا ....

جمله من الافلام مرتبطه بموقف عدي بحياتك .... و كانت كلمة النهاردة ... الجملة الشهيرة .... لحنفي ...انا كلمتي متنزلش الارض ابدا ...


سمعت الجملة وضحكت جدا ..... لانها فكرتني بموقف :)

المدير الي بيوعد ...... و ميوفيش بوعدة ....

كعادتي دائما ... باجي في صف المديرين ... و اقول قولي المأثور حط نفسك مكان المدير .... انا لسه عند كلامي مغيرتوش .... بس دا في حالة الشركات المحترمة بس .... الشركات الي عندها رؤية ورسالة واضحة .... الي عندها نظام محدد .... وليها هيكل واضح ....

يعني في كام حالة هقولوكم عليها .... اول ما تشوفوهم .... تاخد ديلك في سنانك وتخله بسرعة قبل ما يخدك الطوفان في رجلية ...

  • لما مديرك يوعدك بوظيفة .... و تلاقي نفسك بتشتغل وظيفة اقل .... مش هقولك تعمل ايه انت عارف طبعا ... مهو كلمته متنزلش الأرض ابدا .... ( بس علي طريقة حنفي)

  •  لما مديرك يقولك احنا اسقطنا المسميات الوظيفية ....احنا فريق عمل واحد .... ومفيش فرق بين وزير وغفير .... تفهم ان الامور ماشية بطريقة سمك لبن تمر هندي .

  • لما المدير يقولك .... احنا اصحاب رسالة .... و اصحاب رسالة التغيير هم اكثر الناس ضررا من زملائهم .... تعرف انه ناوي يتعامل معاك علي الطريقة الرومانية القديمة .... وهي ارميك في البحر ... ويا تعوم وتنجي بنفسك ... يا تغرق و ساعتها نجيب غيرك.

  • لما مديرك يخليك تشتغل شهر كامل .... وبعد الشها ياخد كل الي تقدمت بيه و يحطه علي طرف المكتب .... ترف ان الي قدمته و تعبت فيه مش هيطلع للنور .... فريح نفسك و متعملش حاجه تاني .

  • لما مديرك يقولك ان الي قدمته دا محتاج 7 مؤسسات لتنفيذه ....يبقي هو شخصيا مش عايز يوجع دماغة ... و كفاية عليه المرتب الي بياخده اخر الشهر .... هو يعني هيقطع نفسه ...

  • لما مديرك يحدد معاك معاد .... و يعتزر فتقولو طب انا المطلوب مني ايه .... يقولك اعمل اي حاجه ؟؟؟؟ اشغل نفسك يعني يبقي مدير فاضله ودنين كبار وذيل ... طبعا عرفتو اقصد ايه؟؟؟؟

  • لما مديرك يوزع الادورا علي فريق العمل و يطلع انت ملكش دور ... فيقولك افتح الانترنت اعمل بحث علي اي موضوع ... تاني مفيش خطة .
  • لما تدخل علي مديرك علشان الوضع مش عاجبك ومعاك استقالة .... و يرد عليك يقول اه منا عارف انك كنت هتقدمها اصلك مش هتستحمل الشغل و حتي ميكلفش خاطره انه يحللك مشاكلك ..... مش عارفه ممكن اسمي دا ايه ؟؟؟؟؟ سموه انتو


كفاية عليكم كده ..... بس اول ما تشوف حاجه من دول ...قدامك حاجه من اثنين ....


 يا تشتغل و تاخد مرتب و اهو الي يجي من عينهم احسن منهم و انا منصحكش بدا لانك كده هتتعدي منهم وساعتها مش هتفقد غير نفسك .... ودي اهم من فلوس الدنيا .

يا تدور علي حاجه تانية .... و تنقذ نفسك قبل ما تصيبك العدوي .... وحط ديلط في سنانك و طير انت :)

Reactions:

0 التعليقات:

إرسال تعليق