الاثنين، يناير 03، 2011

زميلي العزيز ....

السلام عليكم انا اسمى محمد جمال عندى 25سنة انا نفسى اشتغل واكون نفسى واتجوز زى الى فى سنى دلوقتى انا خريج خدمة اجتماعية سنة2007 اشتغلت بمحل العاب ومكملتش فيه اشتغلت فيه بس 3سنين بس سبتوا عشان ولدى كان مريض بالكبد والكلى وبيغسل كلى كل3ايام فى الاسبوع
ومكنش بيقدر يمشى يروح يغسل كلى لوحده لزما حد يكون معاه وانا كنت اكبر اخواتى وكنت انا الى بوديه واجيبة كان بيغسل كلى لمده 5 ساعات كل3 ايام فمكنش ينفع اوفق بين شغلى وبين والدى فسبت الشغل وكمان كان فى ايام ولدى بيخيش فيها بغيبوبه كبد او سكر ويتحجز فىالمستشفى فكان لزما كنت ابقى معاه فمكنش ينفع باى حال من الاحوال انى اشتغل واسيب والدى فضلت كده مع والدى لحد لما اتوفى فى شهر 10 /2010 ابتديت بقى ادورعلى شغل عشان اكفى مصاريف اخواتى الى لسه بيدرسوا دورت على شغل كتييييير وللاسف كل مره اقدم السفى بتاعى مشتغلش اخر مزهقت نزلت اشتغلت على تاكسى بعد الظهر والصبح بشتغل فى مدرسة بعقد مؤقت ب110 جنيه بعد خصم تامينات ومعشات وضرايب بتبقى 50 جنيه بالظبط وانا نفسى اشتغل واصرف على اخواتى واتجوز ويبقى لى اسرة فايريت تساعدينى يااستاذة رشا فانى الاقى شغل 

زميل يعني ؟؟؟؟
بص يا سيدي .... دلوقت انت لو المدرسة دي تعيين ...منصحكش باي حال من الاحوال انك تسيبها .... علي راي المثل القديم ان فاتك الميري اتمرغ في ترابه ...و كنت قبل كده شرحت ميزه انك تشتغل مع مدارس فيه اجازات كتير وكمان مواعيد شغلهم في الطيف دا غير مكافأت الامتحانات و غيره .... 

بالنسبة لبعد الظهر .... عندي كام فكره ممكن يساعدوك و تكون برضه بتشتغل في مجالك هتركز علي الحجات دي 
  1. عندك الجامعات ... (بيوت الطلاب ) مرتباتها معقولة وممكن تشتغل بعد شيفت اليل بس و المرتب بين 800 ل 1000 في الشهر .
  2. كمان الجمعيات الأهليه .... برضو شغلهم بيكون بعد الظهر .
  3. كمان العيادات بتاعت ذوي الاحتياجات الخاصة ( التخاطب بالذات ) دي بتحتاج اخصائيين اجتماعيين و نفسيين .... و غالبا بتكون بعد الظهر في عيادات التخاطب ممكن تتعلم التخاطب و تاخد كورسات وبكده تشتغل اخصائي تخاطب .
  4. كمان عيادات العلاج الطبيعي ...وعيادات الطب النفسي والمستشفيات النفسية ...كل دي جهات خاصة مش حكومة و المرتبات بتاعتهم بتكون معقولة .

بعد كل دول عايز تفضل في التاكسي بتاعك مع الحجات دي براحتك عايز تتفرغ لدول بس الاختيار ليك في النهاية .... و بالشكل دا هتكون جبت عائد مادي مناسب وكمان وظيفة محترمة وتتجوز وتخلف وكل حاجه .


انت خريج 2007 ...يعني لسه في عز شبابك ... اوعي تيأس ... لو متعبتش دلوقت و اطحنت في الحياه هتتعب امتي؟؟؟؟؟؟؟

Reactions:

0 التعليقات:

إرسال تعليق