شغل الصيف :)

ازيك يا روشا بجد انتي ماشاءالله قدوة حلوة أوي ومثال يحتذي به مش هكدب عليكي وأقول إن أنا متابعة جيدة ليكي بس أنا كنت سمعتك علقهوة مع يونس واشتركت ف الجروب وكنت مستنية تعملو حلقة كده عن حاجة هقولك عليها بس قبلها حبة أقول ربنا يجازيكي خير عشان إنتي بتعملي حاجة من أحسن الحاجات ف الدنيا إنك بتيسرلي علي الناس وبتساعديهم بجد ربنا يجعله في ميزان حسناتك يارب

أنا ياستي ف تانية طب أزهر

من زمان وأنا نفسي أشتغل ف الأجازة وهو ده الموضوع اللي كنت نفسي تتكلمو فيه شغل للطلاب ف الأجازات أنا عن نفسي معنديش أي مانع أشتغل بياعة ف محل لأني بحب أتكلم مع الناس وأساعدهم وبحب أي حاجة فيها ناس بس طبعا ماما وبابا مش يوافقو علي حاجة زي دي تشتغلي ف محل

واصل القراءة

الي يسأل ميتوهش

ازيك يا استاذة رشا..

انا كنت عايزة اعرف رأي حضرتك فى حاجتين

قبل ما اقولهم لحضرتك هعرفك بنفسى الاول،انا اسمى مى،لسة متخرجة جديد السنة دى من تجارة القاهرة قسم محاسبة بتقدير جيد جدا،عندى نسبة من الذكاء والقدرة على الاقناع مش قليلة،وسرعة الفهم وبحب اتقن فى الحاجة اللى بعملها جدا،ومعتمدة على نفسى دايما فى كل حاجة،ودايما تفكيرى ايجابى ومش بيأس،بس عيبى انى خجولة فى تعاملاتى مع الاخرين يعنى مش لبقة،بس بحاول اصحح العيب دة فيا بنفسى وبالكورسات،نفسى اشتغل فى وظيفة متكونش روتينية واقدر ابدع فيها واحس انى حققت حاجة فى حياتى.

نرجع بقى للحاجتين اللى عايزة اعرف رأى حضرتك فيهم..

اولا،انا قدمت فى منحة اكتساب المهارات الاساسية فى مجال العمل تبع جمعية جيل المستقبل وعملت انترفيو ومستنية النتيجة اخر الشهر وسمعت عليها كلام كتير بس كل الكلام كويس فكنت عايزة اعرف رأى حضرتك فيها،ولو مقبلتش فيها سمعت ان فى منحة شبهها فى مكتبة سوزان مبارك تبع مايكروسوفت،ياريت برضو اعرف رأى حضرتك فيها..

اما ثانيا،فانا قولت لحضرتك انى عايزة اشتغل فى حاجة مش روتينية ومفتكرش شغل المحاسبة ينطبق علية الكلام دة،ممكن حضرتك تقوليلى اية الوظايف اللى ممكن تناسب مؤهلاتى غير المحاسبة واحس انها مش روتينية

واصل القراءة

يا باش مهندس

السلام عليكم ورحمة الله وبركاته
إزيك يا رشا ؟! أنا اسمي سمر علي بصراحة انا مش عارفة أشكرك إزاي على كتابك عموما أنا باقرأه وانا باكتب الميل بصي يا رشا أنا مش عارفة أبدا إزاي بس عموما هادخل في الموضوع على طول أنا المفروض اتخرج السنة دي من كلية الهندسة اللي قضيت فيها 8 سنين من حياتي طبعا ده نوع من الفشل المبدئي اللي حاجة بجد اتخنقت منها ومش عارفة إن كنت فعلا هاتخرج ولا لا السنة دي 
المهم كل اللي الحاجات اللي انت قولتيها في كتابك أنا كنت باعملها من بداية ما دخلت الكلية أو بمعنى أصح بعدها بشوية علشان كنت عاوزة أنا هأنفع في إيه المهم يا ستي كنت باجيب جرنال الاهرام واشوف الشركات كانت عاوزة إيه في التخصص اللي عاوزة اشتغل فيه وكده وفعليا اخدت خطوة ودخلت على صفحة يلوبادجز وطلعت 40 شركة موجودين في مصر بيشتغلوا في الشغل اللي عاوزة اشتغل فيه بس حاجة انا استفدت منها أنت قلتي عليها أننا نكلم الشركات ودي خطوة إن شاء الله اعملها بعد العيد 
ثانيا أنا مشتركة في فريق في الجامعة عندنا من أكبر الاسر الموجودة في الجامعة ودخلت مسابقة علمية وعندي خلفية مش كبيرة قوي في المجال اللي عاوزة اشتغل فيه بس باحاول اطور نفسي فيه واقرأ وانزل دورات وكده واهو برده باستفيد لغاية لما الاقي شغل.
انا مش من القاهرة من المحلة وطبعا انا جربت الشغل في المحلة هو حاجة بصراحة متساعديش الواحد إنه ينمي نفسه ومهاراته وبصراحة كده حتى المهندسين اللي كانوا بيشتغلوا معايا مكنوش واخدين حقهم يعني كان العمال اللي تحت إيديهم بيتعاملوا أحسن منهم
أنا بعت السي في بتاعي لكذا شركة ومفيش رد ودخلت مليت ابلكيش كتير على مواقع التوظيف ولا شئ يذكر ومش عارفة هي ممكن تكون السي في مش جذابة انا عارفة أنها عبارة عن تسويق لنفسي فممكن يكون السبب فيها حاولت اعدل فيها بس مش عارفة ممكن ابعتها وتشوفيه كده 
وياريت يا رشا لو تقوليلي اعمل إيه بجد انا فعلا كنت مستمتعة وأنا باقرأ كتابك لإن فيه حاجات كنت باعملها وعاوزة منك لو انا متخرجتش ممكن استفيد إزاي من السنة الباقية بحيث إني اعلي نفسي تقنيا واكون المهندسة اللي الشركات عاوزاها وإن الشركات مش بتوظف حد غير بالروتين المصري لازم يكون معاه كعب عمل وما إلى ذلك

يا بنتي تفائلي ان شاء الله تنجحي ... وتتخرجي السنادي .... تفائلوا تجدوه يا بنتي ... طيب في حالة لا قدر الله ... افتكر انك تعملي بحث عام علي احتياجات الشركات .... يعني اتصلي بالشركات و قولي هو انتم ايه المهارات الي بتحتاجوها علشان الناس تشتغل ؟؟؟؟ وبكده هتعملي بحث وافي شافي من قلب الاحداث ....

و تقدري تحسني مهاراتك بشكل اكثر حرفية :)

الورتين المصري مفيهوش أي مشكله .. حاجه عادية يعني ... مش شايفه فيها أي مشكلة...

بالنسبه للسي في بتاعتك هشوفها و ابعتهالك بكل التعليقات عليها .... الي ان ابعتلك 

احب انك تقري التوبيك الي كتبته عن السيره الذاتية و كيفيه عملها ....

واصل القراءة

السلام عليكم ورحمة الله وبركاته
إزيك يا رشا ؟! أنا اسمي سمر علي بصراحة انا مش عارفة أشكرك إزاي على كتابك عموما أنا باقرأه وانا باكتب الميل بصي يا رشا أنا مش عارفة أبدا إزاي بس عموما هادخل في الموضوع على طول أنا المفروض اتخرج السنة دي من كلية الهندسة اللي قضيت فيها 8 سنين من حياتي طبعا ده نوع من الفشل المبدئي اللي حاجة بجد اتخنقت منها ومش عارفة إن كنت فعلا هاتخرج ولا لا السنة دي 
المهم كل اللي الحاجات اللي انت قولتيها في كتابك أنا كنت باعملها من بداية ما دخلت الكلية أو بمعنى أصح بعدها بشوية علشان كنت عاوزة أنا هأنفع في إيه المهم يا ستي كنت باجيب جرنال الاهرام واشوف الشركات كانت عاوزة إيه في التخصص اللي عاوزة اشتغل فيه وكده وفعليا اخدت خطوة ودخلت على صفحة يلوبادجز وطلعت 40 شركة موجودين في مصر بيشتغلوا في الشغل اللي عاوزة اشتغل فيه بس حاجة انا استفدت منها أنت قلتي عليها أننا نكلم الشركات ودي خطوة إن شاء الله اعملها بعد العيد 
ثانيا أنا مشتركة في فريق في الجامعة عندنا من أكبر الاسر الموجودة في الجامعة ودخلت مسابقة علمية وعندي خلفية مش كبيرة قوي في المجال اللي عاوزة اشتغل فيه بس باحاول اطور نفسي فيه واقرأ وانزل دورات وكده واهو برده باستفيد لغاية لما الاقي شغل.
انا مش من القاهرة من المحلة وطبعا انا جربت الشغل في المحلة هو حاجة بصراحة متساعديش الواحد إنه ينمي نفسه ومهاراته وبصراحة كده حتى المهندسين اللي كانوا بيشتغلوا معايا مكنوش واخدين حقهم يعني كان العمال اللي تحت إيديهم بيتعاملوا أحسن منهم
أنا بعت السي في بتاعي لكذا شركة ومفيش رد ودخلت مليت ابلكيش كتير على مواقع التوظيف ولا شئ يذكر ومش عارفة هي ممكن تكون السي في مش جذابة انا عارفة أنها عبارة عن تسويق لنفسي فممكن يكون السبب فيها حاولت اعدل فيها بس مش عارفة ممكن ابعتها وتشوفيه كده 
وياريت يا رشا لو تقوليلي اعمل إيه بجد انا فعلا كنت مستمتعة وأنا باقرأ كتابك لإن فيه حاجات كنت باعملها وعاوزة منك لو انا متخرجتش ممكن استفيد إزاي من السنة الباقية بحيث إني اعلي نفسي تقنيا واكون المهندسة اللي الشركات عاوزاها وإن الشركات مش بتوظف حد غير بالروتين المصري لازم يكون معاه كعب عمل وما إلى ذلك

يا بنتي تفائلي ان شاء الله تنجحي ... وتتخرجي السنادي .... تفائلوا تجدوه يا بنتي ... طيب في حالة لا قدر الله ... افتكر انك تعملي بحث عام علي احتياجات الشركات .... يعني اتصلي بالشركات و قولي هو انتم ايه المهارات الي بتحتاجوها علشان الناس تشتغل ؟؟؟؟ وبكده هتعملي بحث وافي شافي من قلب الاحداث ....

و تقدري تحسني مهاراتك بشكل اكثر حرفية :)

الورتين المصري مفيهوش أي مشكله .. حاجه عادية يعني ... مش شايفه فيها أي مشكلة...

بالنسبه للسي في بتاعتك هشوفها و ابعتهالك بكل التعليقات عليها .... الي ان ابعتلك 

احب انك تقري التوبيك الي كتبته عن السيره الذاتية و كيفيه عملها ....

واصل القراءة

و من الاحباط ...ما قتل

هاى يا رشا ازيك

انا .......... من الاسكندرية شفتك من حوالى اسبوع فى صباح الخير يا مصر و قرأت كتابك شركة اسمها انا من على النت

حلو اوى الكتاب و ده شجعنى ان انا اكتبلك علشان اخد رأيك فى موضوع

بصى يا ستى انا دفعة 2007 كلية الاداب اشتغلت على طول اول ما خلصت فى شركة و كيل لشركة محمول كبيرة و كنت اصغر وحدة فى الشركة كان معايا كام كورس انجليزى على كمبيوتر اشتغلت بيهم لانى مكنش عندى خبرة انا طموحة جدا من اول ما اشتغلت و انا عايزة ابقى حاجة فى الشركة دية و خاصة انها شركة جديدة  و المجال امامى واسع لان الناس الكبيرة كانت بتجلها فرص تانية احسن فى اماكن تانية فبدأت  اخد شوية كورسات فى مبادئ الادارة و كام كورس فى السيلز من كذا مكان و فعلا الناس كلها سمعت عنى و عن شغلى و اتعرفت بالاسم فى الادارة فى القاهرة

و بعد كده جت الحظة الحاسمة و المدير بتعنا مشى و قالو احنا حنخد احسن ناس و نعمل معاهم انترفير و نختار واحد منهم يكون مدير لاسكندرية كلها مديرى هنا فى اسكندرية رشحنى انا ثلاثة من زميلى  بس كلهم ولاد و انا كنت البنت الوحيدة و الاصغر سنا بس من وجهة نظرى انا اكثرهم كفاءة على اساس انا درست شوية فى مجال السيلز و همة لا بس يا ستى و دخلت الانتر فيو و اتكلمت مع المديرين اللى كانو موجودين و مش عايزة اقولك مدى الانبهار اللى كانو فية لدرجة ان زميلى اللى دخلو بعدى عرفوه ده الانهم كل ما كانو يسألوهم سؤال و الاجابة متعجبهمش كانو يقولة ديه ....................قالت كذا بس فرحت جدا  وكان عندى امل كبير انى اخدها

و كان المفاجأ فى اليوم التالى اختارو ولد من الولاد و كمان واحد من المديرين ا تصل بيا فى الدرا 

و قال لى متزعليش احنا مخترنكيش علشان انت بنت و سنك صغير  بس بكرة تكبرى

بالذمة مش من حقى الضايق كل سبب رفضى انى بنت و صفيرة ازاى يعنى

بصى انا من سعتها نفسى اتسدت عن الشغل و شغالة معاهم بسياسة على قد فلوسهم

فقلت ابعتلك اخد رأيك يمكن اكون فى حاجة مش شيفاها  يعنى علشان انا بنت و صغيرة اتجوز واقعد فى البيت و لا ايه و لا البنات ليها سقف معين  مينفعش تعلا عنة ولا يمكن وظيفة السليز ما تنفع بنات اغير مجالى من دلوقتى انا طولت عليكى انا عارفة بس عايزة رأيك بجد و ياريت تردى عليا على الميل و تقليلى اقرأ المقالات اللى بتكتبيها فين????

شوفي يا جميلة ... أولا انا مش شايفة انك تزعلي و لا حاجه .... احيانا كثيره بيكون الواحد ناقصة شوية حجات صغيره لما بيكملها .. محدش بيقدر يقف قدامه

غير كده انتي لازم تحطي نفسك مكان الناس الي اتخذت القرار و فكري من وجهة نظرهم لو انتي مكانهم كنتي عملتي ايه؟؟؟؟؟ خاصة لو كان المنصب كبير ... او مدير بالاخص .... يعني لو فريق العمل رجال و كبار ... بيكون صعب اني اجيب حد اصغر منهم .... حتي لو كان شاطر جدا ... و كمان بنت يا نهار ملوش لون ...

بصي فكري بايجابية .... ربنا مش بيعمل حاجه وحشة للانسان ... يعني تخيلي السيناريو الي ممكن يحصل لو انتي بقيتي المديرة ... ممكن يتكاتلو عليكي ... و يوقعوكي في مشاكل.. لمجرد اثبات انهم صح ... و انك غير جديره بالمكان ... و كنتي هتخسري اكثر ما تكسبي ...

احسن حاجه تعمليها تشتغلي زي الاول و احسن كمان و بكده تتفتح امامك فرص اكثر لكن لو اشتغلتي اقل .... فرصك هتقل برضه في الترقية ...

بالنسبة لمقالاتي ممكن تقريها في البلوج ...

واصل القراءة

بره الصندوق ...

 السلام عليكم انسة رشا

انا ضفت حضرتك وكان نفسى اتكلم معاكى لانى بجد محتاجه اتكلم معاكى جدا بعد ماقريت الكتاب بتاعك والتزمت بالطرق اللى انتى قولتيها  وجالى وظايف كتير والحمد لله واتقبل السى فى فى شركات كويسه جدا 

بس المشكله من الاول مش فى انى يكون عندى هدف محدد وانا احققه المشكله فى العادات المترسخه فى عقول ناس شايفه انها خايفه عليكى بس اى خوف دا يسمح لحد انه يخليكى بدون قيمة وانك تفضلى قاعده حاطه ايدك على خدك وفى مكان مفيهوش اى جديد ولا فى اى تنمية لتفكيرك

مشكلتى تتخلص فى انى مستقرة انا وعيلتى فى اسوان ومتخرجه من كلية الالسن قسم لغة فرنسية خلصت الكلية واشتغلت فى ففرع عقيم لشركه سياحية سكرتيره كل اللى بعمله وكل يوم انى موجوده على النت بستقبل ايميلات من فرع القاهرة  واجى حطاه فى اجنده كبيرة حتى  لو قولت انى اهو بستخدم لغة تانيه وهى الانجلش انا مش بستعملها يادوب سامبه معينه انا بكتبها فى كل ايميل بستقبله او ببعته 

يعنى ولا مستفيده من الفرنسى اللى اتعلمته اللى كان نفسى ابقى شئ فظيع فيه واوصل لانى اتكلم بيه واكتبه واوصل لترجمة القرءان الكريم  ولانى اتخرجت من الكليه ومكنوش بيهتموا غير بالمواد النظريه مش اننا نخرج نتكلم لغه اتعلمتها دورت كتير هنا على مكان اخد كورسات واخد شهادة الديلف اللى بداتها فى الكليه مش لقيت وحتى لما لقيت  وقولت ماشى اخد مع ناس اقل منى وبعدها نبدا نعلى لقيت انى مستوايا اعلى من اللى بيدرسوا كانى اكتب اللغه دى لكن انطقها برضو مش بيهتموا ولما تعبت من التدوير سالت الدكتره بتوعى اللى كانوا فى الكليه ازاى ابقى كويسه جدا فى اللغة الى درستها وصفولى المركز الفرنسى بالمنيرة طب وازاى وانا فى اسوان  وكمان كان نفسى اطور نفسى فى مجال الترجمه وادخل معهد للترجمه سنتين  فقولت احسن حل انى اقضى السنتين دول هناك والتزم فى الكورسات وكمان من ناحية انى اصرف على نفسى منا ممكن القى وظايف كتيرة واتبعت طريقتك فى البحث عن وظيفه الاول وعملت داتا لنفسى فى الاماكن المتاحه ليا والحاجات اللى شايفه انا ممكن اقدر اعملها و والحمد لله ربنا يسر ليا حاجات انا مكنتش متخيله انى اتقبل فيها ولما جيت افتح معاهم الموضوع دا فى البيت مقولكيش على اللى حصل وهتعملى ايه يعنى هتبقى وزيره واخرتها ايه انا مش عاوزه حاجه من نفسى اد منا عاوزه انى القى نفسى فى حاجه بجتهد فيها وبعملها انا كدا غلطت واى خوف عليا اللى اهلى دول خيفينه 

انا اسفه انى طولت عليكى بس ياريت بجد القى عندك حل ليا 

بصي يا ستي .... كلامك جميل جدا و بجد انا معجبه بيكي دا غير انك كمان دعمتي افكاري ...يعني انتي نفذتي الي قلتة في الكتاب و الحمد لله ربنا كرمك ...

طيب نخش علي الحل ....

الانترنت الحقيقه حققت احلاااااااااام كل الناس ...

انتي ممكن تاخدي كورسات اون لاين .. و ليا شهادات معتمده و كل حاجه انا شخصيا قبل كده اخدت كورسات اون لاين و شهادات من بره بيكون فيه مدرس و بتجاوب معاه و كل حاجه زي الكورس الحقيقي بالظبط ... اعملي بحث و ان شاء الله تلاقي ... كده حلينا مشكلة الكورسات ...

الشغل ... الفرص الي جتلك و أهلك الي مش موافقين .... علي فكره هم ليهم حق يخافو عليكي خاصة انهم مش في بلد في بحري ساعة و يكونو عندك .... دي اسوان يعني علشان حد يجي يزورك ... فيها يوم بليلة سفر... ارجوكي تفهمي ظروفهم .. و بالشكل دا قدام حل من اثنين ...

لو عندك اخ مثلا أو حد ممكن يعيش معاكي و تنزلو مع بعض تشتغلوا .... اهلك مش هيكون عندهم حجه ... لو مفيش .. يبقي نروح علي الحل الثاني ... برضه هو الانترنت ... ترجمي – ادي كورسات فرنساوي – اعملي بلوج فرنسية مثلا بتتكلم عن مصر و الاثار – ممكن تتعلمي ارشاد سياحي و تغيري الشغلانه الي مش عجباكي – ممكن كمان تشتغلي مرشد سياحي حر ... يعني تعلني عن نفسك علي الانترنت ... و لما الناس تيجي مصر تظبطيلهم البرنامج .... الحقيقه الافكار كتير ... اخرجي بره الصندوق ... و فكر و اطلعي بافكار جديده و غير تقليدية ... لكن تناسب ظروفك :)

ربنا معاكي 

واصل القراءة

مفيش كلام تاني :)

بدايه انا سنى 19 كنت ف كليه السن قسم صينى وحولت وعندى طموح انى اكمل واخد كورسات بس بعدين احتمال بعد الكليه 

ودخلت كليه التربيه قسم انجليزى عام 

ومستوايا ف الترجمه حلو للبي ينكتب والى بيتقال واللى بيتقال اكتر بصرااحه 

انا عندى امكانيه اقناع اللى قدامى بشكل كبير من غير م احسسه انه مجبر

عندى صبر كبير ع الكمبيوتر ومحدش تقريبا علمنى حاجه عنه وانا اللى 

اتعلمت كل حاجه تقريبا كل حاجه اعرفها عنه حاليا ا

انا نفسى احدد انا ممكن اشتغل ايه وبالتالى الكورسات المتاحه ليا ايه لانى ناويه اخدها خلال الاجازات الكبيره من كل سنه اخلصها ... وحاليا انا بخلص ف كورس icdl

اكون شاكره ليكى لو ساعدتينى لانى انا اول حاجه ف دماغى الشغل واثبت نفسى

يعني انا مش فاهمه انتي بعتالي ليه .... يعني انتي يا بنتي ما شاء الله عليكي بسم الله ما شاء الله و الله .... و مش مجامله دا انا بدور علي الناس الي عارف قدراتها و امكانياتها .... مبقاش فيه ناس موجوده ....من النوع دا ...

طيب طالما شاطره في الترجمة و عندك صبر علي الكمبيوتر ... طيب متجربي كده من دلوقت تسلي وقتك  انتي لسه طالبة في الترجمة ... ادخلي علي المواقع بتاعت الترجمه و ترجمي ... حتي ممكن تترجمي ببلاش في الاول علشان ايدك تاخد علي الموضوع ... و عندك حجات كتير .. دا اول خطوة ...

ثانيا ..... انتي عارفه مهاراتك ... يعني عندك قدره علي الاقناع افتكر اللغة و الكمبيوتر والقدر علي الاقناع ممكن يشتغلوا حجات كتير ... ممكن علاقات عامة ممكن تسويق ممكن منسق مشروعات حجات كتير يعني ... هتقدري تعرفي الوظيفة المناسبة بالخطوات التالية ...

1-  اعملي بحث عن كل الوظائف المتاحة من الجرايد – مواقع التوظيف ...الخ.

2-  اعملي بحث علي جوجل و دوري علي التوصيف الوظيفي بتاع الوظائف كلها ( التوصيف الوظيفي دا هو وصف تفصيلي لكل المهارات و الامكانيات المطلوبة في الشخص الي هيشتغل في الوظيفة دي).

3-  من خلال البحث دا هتقدري تعرفي ايه هي الوظايف الي ممكن تستغلي فيها امكانياتك و مهاراتك ...

واصل القراءة

هم دول الي بدور عليهم !!!!

أزيك يا رشا

عامله ايه 

 كل سنة وانتي طيبة 

بصي انا مش عافه انتي هتبقى فاضية تبصى على الميل ولا لأ 

بس انا محتارة بقالي فترة وبفكر في كذا حاجة 

وبالصدفة لقيت كتابك وقريته 

بصي انا خريجة كلية ألسن قسم اسباني السنة دي 

وبدور على شغل 

بس عندي مشكلة بسيطة 

انا أملي اني اشتغل في الملحق الثقافي المصري في اي بلد بتتكلم اسباني 

وفي نفس الوقت افتح مكتب ترجمة يهتم بنقل الثقافات دي بلغتنا 

بشوية افكار جديدة عن الترجمة الحالية 

بس الحلمين دول بعاد شوية 

و بيتطلبو مني اني اتعلم حاجات كتير اوي ماتعلمتهاش في الكلية 

يعني اني اتدرب اكتر ع الترجمة واتعلم اكتر 

واني ادرس اللي يأهلني لموضع السلك الدبلوماسي ده 

وطبعا الدراسة دي مش ببلاش

انا في دماغي اني احقق الحلم ده خلال من 10 ل 15 سنة 

وفي خلال الفترة دي كلها انا المفروض اني اشتغل علشان اجيب فلوس علشان اتعلم بيها 

مش عارفه اذا كانت دي اصلا حاجة صح ولا لأ اني اكون بشتغل للفلوس 

بس هي دي ظروفي اللي المفروض اني اتقبلها 

مشكلتي دلوقتي اني مش عارفه ابتدي ازاي

اشتغل فين 

السي في بتاعي اعتقد انه معقول بالنسبة لاني لسه متخرجة 

و بعتته لأماكن كتير لشركات ممكن تطلب اسباني 

بس المشكلة ان الاسباني زي ما بيقولو سوقه واقع في مصر

انا عايزاكي تساعديني تقوليلي ممكن ابتدي ازاي 

وشكرا ليكي مقدما

لو مكنش عندي وقت اقرا الميل .... أفضالك ... دا انا معجبة بيكي جدا ... أخيرا لقيت حد بيفكر في مستقبله .. و راسمه خطه ... بسم الله ما شاء الله عليكي ... يا ريت الناس تتعلم منك...

نيجي بأه للاجابة ... بصي يا ستي سوق الاسباني قليل في مصر .... نخرج بره مصر ... طب دا هنعمله ازاي ؟؟؟؟

هتسألي الحاج GOOGLE عن مواقع العمل عن بعد و الترجمة و خاصة الاسباني و احب اقولك حاجه لطيفة ان سوق اللغات التانية غير الانجليزي و الفرنسي موجوده بكثرة علي مواقع العمل عن بعد ... بالشكل دا انتي اخدتي فلوس و اكتسبتي خبرة في الترجمة ... ووفرتي وقت ومجهود للمذاكره و بناء مستقبلك ... غير كده وكده ... افتكر ان ممكن تشتغلي مع شركات السياحة في الوقت الحالي ... برضه هتستفادي انك تمارسي اللغة وفي نفس الوقت فلوس ... معلش في الاول هتتعبي شوية ... لكن لو متعبتيش و انتي صغنونة كده هتتعبي امتي …. تاني بقولك معجبة بيكي جدا و طمنيني دائما عليكي ... و ربنا يوفق ان شاء الله

واصل القراءة

محتار اختار مين فيهم؟؟؟؟؟

ازيك يا رشا رمضان كريم......انا كان عندى سؤال انا ان شاء الله داخل رابعة تجارة انجليزى وبحب اوى الادارة و 

عايز اتخصص فيها ان شاء الله بس ناس كتير بتشتغل بتقولى انى اذا تخصصت محاسبة يبقى احسن و تقدر تشتغل فى 

المجالين و ادارة حتبقى الشغل محدود مش زى المحاسبة بس انا محتار اوى ممكن تقوليلى اية الافضل لانى بحب 

مجال التسويق اوى وانشاء الله اشتغل فيه واسف جدا لانى طولت عليكى

شوف ... انا عايزه اقولك اني دخلت خدمة أجتماعية ... و كل أهلي و أصدقائي كاني يقولو دا معهد الفاشلين ... لكن 

انا كنت عارفه انا عايزه ايه ... وجهة نظري طالما انت بتحب الادارة توكل علي الله و ادخل أدارة و أبدع فيها ... 

وبعد كده لما هتشتغل في التخصص الي انت بتحبة أكيد هتبدع و هتكون افضل من انك تخش مجال اخر و تكون مثلك 

مثل اي حد تاني ... ادخل التخصص الي بتحبة و متتأثرش برأي حد .. ربنا معاك ... و ادرس السوق و جهز نفسك 

علشان لما تتخرج تكون جاهز لسوق العمل علي طول.... 

واصل القراءة

تفتكري مين يجي قبل مين ؟؟؟؟؟؟؟؟؟؟؟؟

ازيك يا رشا والف مبروك على الكتاب

انا قراتة كلة وفعلا استفدت جدا

انا ..................  مهندس ديكور حر

بشتغل من 10 سنوات فى شركات واعمال حرة

بحب السفر جدا وسافرت فى حتت كتير

سؤالى

الشغل الايام اللى فاتى بداء يبقى بطىء وانا مليت وحبيت اجدد اسلوب شغلى

اصحابى اقترحوا عليا التسويق عن طريق الجروبس على الفيس و البلوج ودة

عاجبنى وابديت الفكرة انى بفكر اعمل ويب سايت وناس بتقلى استنى شوية لما

يكون عندى شعبية وبعدين ابداء وناس تقولى اعملة دلوقتى وطورة بصراحة مش

عارف اعمل اية انى معنديش داتل جبارة وكان نفس اعمل فيديو واديوا وحاجات

تنفع لمشروع برنامج عن الديكور تفتكري اطلع بويب وبعدين اطورة ولا اكتفى

بالجروبس والحاجات دى لغاية ماتشيهر شوية مستنى رادك ومتشكر جدا على وقتك

واهتمامك

التسويق الألكتروني يشبة التسويق العادي في حجات كتير و علي فكره الاثنين مكملين لبعض و دي وجهة نظري ...

نسبة لتبتدي ايه قبل ايه .... افتكر تبتدي Group و Fan page لان حتي لو عملت web page ....  هتحتاج ناس و دول هتجيبهم من خلال الشبكات الاجتماعية ... اتمني اكون كده جاوبت علي سؤالك ... و انا انصحك تاخد كورس تسويق ألكتروني أو تقرا فيه هو الموضوع سهل جدا بس محتاج مهارات .. ربنا معاك

واصل القراءة