الأربعاء، يناير 20، 2010

سوقت صح و لا لسه؟؟؟؟

من كام يوم كده و انا فاتحة الفيس بوك .... معرفش جت في دماغي فكره غريبه ... لقيتني بكتب عووو أنا العفريت ... شبيك لبيك .... أطلب 3 طلبات ... هتطلب ايه؟؟؟؟؟؟ و سألت كل الناس الي في الياهو و الفيس بوك .. كان الرد لطيف أوي ..... مش عارف ؟؟؟ و دا كان رد الغالبيه العظمي من ناس كتير جدا.... يا اما باه الاجابات التقليديه .... الستر والصحة ... فلوس ... راحة البال .....ألخ.
ايه يا جماعة دا سؤال بسيط ...؟؟؟!!!يعني بأختصار محدش عارف هو عايز ايه ؟؟؟ طب هيوصل زاي .... علي فكره مش مشكله خالص انك تكون تايه في شارع زحمة .... بس المشكله انك ميكونش معاك العنوان الي انت اصلا عايز تروحله .... طب لو استنجدت بحد في الطريق ؟؟؟؟ هيدلك ازاي؟؟؟ منت أصلا مش عارف؟؟؟؟
طيب يا تري فاكرين احنا وقفنا فين؟؟؟؟؟
أحنا أخر حاجه اتفقنا عليها اننا نشتري جرايد التوظيف ونراجع مواقع التوظيف برضه ونعمل أحصائيات علشان نعرف متطلبات السوق .... طيب خلاص عرفنا متطلبات السوق و عرفنا الوظيفه دي بتحتاج ايه ؟؟؟؟ وحددت باه خلاص انا عايز اشتغل (......... ) و رحت أخد كورسات ... بس مش بس انجليزي و كمبيوتر دلوقت الكورسات بقت حاجات تانيه كتير فيه في الاداره و ادارة الوقت و السكرتاريه و مهارات العرض و مهارات الاتصال و خدمة العملاء...... الخ.
أكتب السيره الذاتيه بتاعتي بأه ( RESUME , CV ) و دي علشان أكتبها محتاجه مهارات وطريقه زي ما اتكلمنا قبل كده ...... يعني ايه الكلام دا؟؟؟؟؟ يعني فيه شوية قواعد ه لازم نراعيها في كتابة السيره لذاتيه ... هم ايه؟؟؟
• الأمانه و الصدق في المعلومات المذكوره ... يعني مبقاش مبعرفش اتكلم ايطالي و كاتب اني اتحدث الايطاليه بطلاقه لا مش هينفع خالص أو اني عندي خبره 20 سنة و انا اصلا مشتغلتش غير 10 .
• الصورة الشخصية ... مش لازم تحط الصوره إلا لو كان مطلوب وضعها و في الحال دي اختار صوره مناسبه... يعني مينفعش احط صورتي في رحله مثلا ... احط صوره زي بتاعت جوا السفر كده هاديه و مريحه و مش مبهرجه.
• السيره الذاتيه بتتكتب علي ورق ابيض يا جماعة... مش ألوان لو تفتكرو معايا فيلم legally blonde لما البطله ادت السيره الذاتيه بتاعتها علي ورق روز ... المشرف عليها بصلها باستغراب.... و قالها ايه دا؟؟؟؟.
• الخط..... الخط لازم يكون واضح و الفونت واحد غالبا 12 لكن العناوين ممكن استخدم خط اثقل ومنساش المراجعة بعد الكتابه دي أهم حاجه علشان الاخطاء الإملائية و مراجعة قواعد اللغة كمان .
• مهم جدا اتكلم عن هواياتي ،الانشطة الي كنت بقوم بيها في الجامعة ، لو مشترك في انشطه مجتمعية الحاجات دي بتفرق جدا في السيره الذاتيه ... لان في الاول و في الاخر الشركه عايزه تشغل انسان مش ّاله.
• ارجوكم يا جماعة بلاش نبتدي الصفحة بعنوان كبير في النص Curriculum Vitae مش محتاجين هي الشركه الي انت مقدم لها عارفه علي فكره ان دي سيره ذاتيه.
• انا مصري و مولود في مصر و عايش في مصر.... تفتكرو لغتي الاولي تكون ايه ؟؟؟ أكيد مش صيني ...طبعا عربي طب بكتبها ليه ؟؟؟ خلينا نركز علي اللغات الثانيه .
السيره الذاتيه مهمه جدا يا جماعة :
• هي مُلخص لتاريخ حياتك المهني أو الأكاديمي يمكنك استخدامها لتعرّف عن نفسك عن طريق كتابة بياناتك الشخصية خبراتك, إمكانياتُك, انجازاتك, مهاراتك وقدراتك … الخ.
• هي الطريقه الي بتعرض بيها نفسك ... الشركه معندهاش وقت تقابل كل الناس الي متقدمه للوظيفة.
• السيره الذاتيه انعكاس لشخصيتك ....منها بقدر كشركه اعرف انت مين؟؟؟؟
السيره الذاتيه هي انت ..... يا تري عايزني أشوفك أزاي ؟؟؟؟ أنت الي بتحدد علي فكره كل ما كانت سيرتك الذاتيه صح وواضحة و مفيهاش غلطات .... بقيت انت صح وواضح و مفكش غلطات ...
كل الي عملناه دا كان مجرد تسخين أحنا لسه منزلناش الملعب علي فكره ..... طب هنلعب امتي ؟؟؟؟ في التوبيك الجاي اقولك هنلعب أمتي ؟؟؟ وأزاي ؟؟؟؟ وفين ؟؟؟؟ والأهم من كل دا هننزل الملعب و نلاعب مين ؟؟؟؟


رشا خليفه
rashamkhalifa@gmail.com

Reactions:

0 التعليقات:

إرسال تعليق