الأربعاء، يناير 20، 2010

حرام عليكم يا شباب مصر!!!!!

عملت أعلان من كام يوم ...طلبت فيه وظايف معينه للشركة الي بشتغل فيها .....و علشان مسئولة الاتش أر اجازه عقبال عندكو راحت امريكا تزور ابنها لمدة شهرين ....فمين الي يشيل الموضوع ...الفقير الي الله ...المهم و فتحت الميل ولقيت حوالي 90 سيرة ذاتية مبعوته ....تمام كويس أوي ...يبقي ان شاء الله نلاقي الشخص الي بندور عليه .....طيب الاول نشوف الاعلان كان بيقول ايه؟؟؟؟؟
مطلوب لشركة كبير
HR and Adminstration
السن : من 25 ل40 سنة
الخبره : من 3 ل 15 سنة خبرة
النوع : رجال
المؤهل :
مؤهل مناسب
برجاء ارسال السيرة الذاتية علي
rasha.tips@gmail.com
أخر موعد للتقديم
20/12/2900
أول حاجه ....أنا طالبة ايه؟؟؟؟Hr and Administration ....جبت سيرة مبيعات ؟؟؟و لا تسويق؟؟؟و لا حسابات ؟؟؟طب جبت سيرة خدمة عملاء ؟؟؟؟
الي اتبعتلي باه أولا ....
مش كاتب في خانة الموضوع سبب الرسالة ايه ؟؟؟؟ مفيش
طب هتشتغل ايه ؟؟؟؟ مفيش
الكوميديا باه ....واحد باعتلي في الموضوع انه HR ...أفتح السي في ....اول كلمة الاهداف ...عايز اشتغل خدمة عملاء ....مش فاهمة .....طب اعمل انا ايه؟؟؟؟؟

طيب ثاني حاجه ....السن ....دا مفيش مشكلة .....

الطلب الثالث .......الخبرة ....دي سيباها لضميركم ....مفيش حد كاتب خبرته بشكل مرتب ....برضه مش فهمه ليه؟؟؟؟

الطلب الرابع ....احنا قايلين عايزين ولاد ....طبيعة الشغل للولاد ....البنات باعته السي في ليه؟؟؟؟؟

قلنا ابعت السيرة الذاتية علي البريد كذا كذا ....الي باعتلي من بريد الكتروني اسمه سمسم ...و الي حاطت السي في الرساله علي طول ...حتي مش هاين عليه يبعتها مرفق بالرساله ...و الي مش كاتب Cover Letter دا الحقيقه محدش كتبه تقريبا ....يعني عدد الي كتبوه يتعدو علي الصوابع .....

عايزه اقول ان ال 90 سيرة ذاتية الي استقبلتهم .....أخذت منهم 8 .....و أضطريت بعد كده لاني مزنوقة و محتاجه عدد من الناس أكلم أصحابي ...و الناس الي اعرفهم واجيب سيفيهاتهم ....

دلوقت بأه السؤال ؟؟؟؟؟ يا تري ؟؟؟؟ البلد فعلا مفيهاش بطاله ؟؟؟؟ و لا أحنا الي مش عارفين نقدم في شغل ؟؟؟
علي فكره الموقف دا مش أول مره اتعرض ليه ....من مده طويله كنت بدور علي سكرتيره ....و قلت مش مهم الخبره بس اهم حاجه تكون تعرف انجليزي .وكمبيوتر ....اظن مفيش أسهل من كده ؟؟؟؟
أولا ....جالي عدد قليل من السيفيهات....مع ان الناس بتصوت مفيش شغل.
ثانيا ...اتصلت بالناس علشان معاد المقابلة الشخصية....... من 15 بنت ....جالي 5...حتي الي مجوش مرفعوش سماعة التليفون يعتزرو ....

بجد يا شباب مصر ......حرام عليكو الي بتعملوه في نفسكم ......بجد حرام

رشا خليفة

Reactions:

0 التعليقات:

إرسال تعليق