الأربعاء، يناير 20، 2010

عيدنا مع بعض ..و استفدنا كتير

وخرجت لاول مره في حياتي في العيد ......ومش اي خروجه لا حديقه عامه ...زحمة و عيال بتلعب كوره ...و شباب و بنات لابسين لبس العيد ...مش مصدقه ...اني عملت كده ...ابتدت الفكره قبل العيد و قلت ليه مجمعش الجروب و نتعرف علي بعض

و كنت قاكره ان اليوم هيعدي عادي كده زي اي يوم ...ناس متعرفش بعض ...تتعرف و خلاص ...لكن الي حصل كان مفاجأة ..فعلا !!!

الناس الي حضرت بجد اسعدوني بحضورهم ...و اتفقنا علي حاجات كتير منها ...

شريف و خالد ...حدوتة مصرية ...قلنا هنعمل تغطية ميديا للانشطه الي بنفذها في الجروبات بتاعتنا و علشان كده عملنا جروب اسمة ادمين بس ...و هينضم فيه الادمين بس بتوع الجروبات ..و نتناقش في الافكار بتاعتنا ..و نتبادل الخبرات ..و كمات نساعد بعض ..و ايد علي ايد ...فكره علي فكره ...هنطلع حاجه جامده جدا ...

محمد زكريا ....أستاذ قانون الجذب ... مناقشة مفتوحة ...استفاد منها كل الحاضرين ..دا غير انه عمل تخفيض 30% لكل الحاضرين لليوم دا لمحاضر ة يوم السبت القادم ( قطع الحبل الا واعي ) 5-12-2009 بالاكاديمية البريطانية ...بس ابعتو لمحمد الاول مين الي هيروح ...دا غير انه اتكلم عن مواضيع كتير و جاوب علي اسئلة الحاضرين.

و نهاد رجب ...برنس التنويم الضمني ...برضه جاوب علي اسئلة ناس كتير و شرح لنا يعني ايه تنويم ايحائي و ضمني ..و كلام كتير كده اعلي من مستوي تفكيري ...سايباه للناس االعظام دول ...خليني علي قدي ...و ماشيه جنب الحيط....

و كمان عم مرسي ...الي نورنا و شرفنا ..بوجوده ...و مستنين الفيديو يا برنس.

مهندس الصوت ..وليد..راديو حريتنا ...عرض خدماته لكل الي عايز يتعلم تصميم جرافيك ...و الشباب الي عايزه تتدرب علي هندسة الصوت من الجروب ....

و احلي بنات فنون تطبيقية ....عرضو علينا انهم ينظمو مجموعة ورش عمل في اماكن مفتوحو لتعليم الرسم و تصميم الحلي ..فنون في فنون يعني.

دا غير اننا اتفقنا علي اجتماعت دورية ان شاء الله هنظم ليها ..و نعرفكم المواعيد ان شاء الله قريبا ...يا شباب بجد اسعدتوني بوجودكم ..و اسعدتوني اكتر بتعاونكم ..والخدمات الي هتقدموها للناس ..هو دا الي كنت بحلم بيه... ودي رساله مني لكل اصدقائي ...و للجروب و لاي جروب تاني ...خلونا نبدع اكتر و ان شاء الله نساعد بعض دايما

طبعا هتسالو و انا كنت فين ...انا باه الي جمعت كل دول مع بعض ...الفقير الي الله ..رشا خليفة

و ايد لوحدها ...متسقفش ...مستنيه مقترحاتكم ...علشان نبتدي نحدد هنفذ ازاي

رشا خليفة

Reactions:

0 التعليقات:

إرسال تعليق