الاثنين، يناير 18، 2010

شيء لا يصدقه عقل؟؟


الحقيقه النهارده قررت انزل الشغل بدري علشان عندي شغل كتير جدا ...و انا ماشيه علي الدائري بعد كارفور بشويه ...لقيت في نص الطريق عربيتين موقفين الدنيا ...بس مفيش حادثه يعني ربنا ستر و مخبطوش في بعض ...بس الاثنين أصحاب العربيات ...موقفين العربيتين في نص الشارع ...ونازلين خناق.... بقيت الناس نازله كلكسات علشان متاخرين علي شغلهم ......و هم و لا هم هنا .......

المهم قلت انا لازم اكون في المكتب الساعة 8:30 ودلوقت الساعة بقت 8 يعني لازم نحل الموضوع ....... سبت زئردتي حبيبة قلبي و نزلت ....قلت اشوف ايه الحكايه ...... و بابتسامة عريضة ....قلت للاثنين صباح الخير..... لقيتهم سكتو وبصولي بأستغراب .... قلتلهم انا رشا خليفة... هم الاثنين مش فاهمه سهم الله الي نزل علهم lمش عارفه ليه ؟؟؟؟؟

قلتلهم هو ايه الحكايه ؟؟؟؟ فقالولي ان واحد فيهم عدي الثاني وكان هيخبط فيه ....فقلتلهم حضرتكم شايفين كم العربيات الي واقفه؟؟؟؟ و الناس دي متاخره علي شغلها ؟؟؟؟و انتو الحمد لله مفيش مشكله ....بس متسببين في وقفة الشارع .... عندي اقتراح ....ممكن تيجو علي اليمين ..... و تكملو حناقه عادي ...بس من غير متأثر علي حد....... الحقيقه الاثنين بنرفزه ...قالو لا خلاص و مشيو .....و حليت ازمة المرور ....صحيح رحت الشغل متأخره 10 دقائق ...بس ماشي الحال .....

طول الطريق بفكر ....الطريق متقسم 3 حارات ...يعني كل حاره المفروض يمشي فيها عربية واحدة .... للاسف ماشي فيها عربيتين ....و بيسابقو بعض ......كل واحد همه انه يوصل وخلاص ....الي جنبه دا يعمل حادث يخبط في غيره ....مش مشكلته.....!!!!!!

والعربيات الفخمة ....الي الزبالة بتترمي منها ......!!!!!

و الاشارات اليمين و الشمال ...الي محدش بيستخدمها ....وفجأه تلاقي عربية معدية من اقصي اليمين لاقصي الشمال أو العكس .... مع أن الخواجه الي عمل العربية .....عمل اشارات علشان الي جاي وراك يعرف انت رايح فين؟؟؟؟ فميخبطش فيك ...... شيء لا يصدقع عقل !!!!

و الناس الي فجأه تقف .....مهو فيه اشارة انتظار علشان اعرف انك هتقف دلوقت فاعمل حسابي...و أهدي....شيء لا يصدقة عقل!!!!!!

ولا الجزيرة الي في نص الطريق ...الي معمول عليها حديد علشان الطريق سريع ....فالمشاه يسخدمو الكوبري أو انفاق المشاة ......لكن الناس تعدي وسط العربيات السريعة وتنط من فوق السور ....طب مش خايفين من العربيات الي جايه بسرعة ...ولا خايفين من وهو بينط من علي السور يقع يتعور......المصيبة اني شفت بنات بتعمل كده .....شيء لا يصدقه عقل !!!!!!!

دا غير الناس الي في وسط البلد الي بتركن صف ثاني ......!!!!!

والناس الي سايبة الرصيف وماشيه وسط العربيات .......!!!!!!!

و الاطفال الي سايقه عجله و ماشية في نص الشارع ........طب امشي علي اليمين!!!!!!!

والي راكب موتسيكل وماشي علي الشمال ........الي هو اصلا للسيارات علي اقصي سرعة !!!!!!!!!

دا غير السادة .....سواقين الميكروباص ....دول باه نو كومنت !!!!!!!

والعربيات النقل الي بتمشي في الشوارع في نص النهار ......علي الرغم من ان اصلا المفروض يمشو من 12 ل7 صباحا....... غير كده اساسا مكانهم يمشو علي اليمين ...ماشين علي الشمال ليه؟؟؟؟؟

طب انتو مش معايا ان...... دا شيء لا يصدقه عقل؟؟؟؟؟؟؟؟؟؟؟؟؟؟

مستنية رايكم

رشا خليفة

Reactions:

0 التعليقات:

إرسال تعليق