الأربعاء، يناير 20، 2010

حدوتي المصرية

كل واحد عنده حدوته مصريه ... مرتبطه بمكان ... بمرحله مرينا بيها .... أي حاجه المهم يعني انا عندي حدوته مصرية و مرتبطه بمكان ....من وجهة نظري احلي و اجمل مكان في الدنيا.
بورسعيد ....!!!!!
أولا انا مش بورسعيديه ...أنا طنطاويه ...شيل الله يا بدوي ..
من ونا في اولي أعدادي ماما عودتني ان كل سنة اسافر رحلة مع المدرسة اسبوع في الصيف ... و شأت الاقدار أن كل سنة تكون الرحلة لبورسعيد .... فضلت في الحكاية دي لحد ما اتخرجت .... كل صيف علي الله الم شنطتي و اسافر مع المدرسة في اجازة الصيف....
أحساس أن الواحد لوحده .. في بلد ميعرفس فيها حد ... و ميزانيه محدده ...طلعت نزلت تمشي علي قدها ... بجد كانت ايام جميله اوي .....
بورسعيد فيها ايام شقاوتي ... لما نتمشي عند دليسبس ساعة المغربية ... و ناكل ترمس .. و تتفرج علي المراكب في القنال ... و تعد تفكر في حكيات و روايات .... كنت دايما بفتكر المسلسل بتاع The Love Boat ..الي كان بيتعرض علي القناة الثانيه ....
أيامها مكنش فيه غير الحي التجاري .... و الحي الافرنجي ... و مكنش فيه زحمة زي دلوقت ... و كمان محلات الاكل كانت معظمها سمك ..... غير محل واحد في ميدان انا مسمياه ميدان القواقع .... علشان كان فيه نافوره علي شكل قواقع و قدام النافوره ...أول بيتزا كلتها في حياتي .... و اول فنجان قهوة .... مش بقولكم بورسعيد دي احلي مكان عندي .....
مش حكيلكو علي قعدة البحر ... و الصيادين الي تلاقي السمك الي لمعته زي الفضه ...
و لا المعديه الي تودي علي البر التاني .....
و لا بور فؤاد و البيوت القديمة ... تحس و انت ماشي كانك رجعت بالزمن ...لعهد مشفتوش ....
من كل دا عايزه اقول اني بجد استمتعت بحياتي ... بس غير كده كمان اتعلمت ازاي اعتمد علي نفسي ...عرفت انا ايه ...
شكر كبير لأمي الي شجعتني علي كده ....
و رساله لكل الاهالي ... أدو ولادكم فرصه ...انهم يتعلموا و يعرفهم قدراتهم ايه؟؟؟؟ متخافوش ...دا هيخليهم واثقين في نفسهم .. و عندهم قدره علي اتخاذ قرارات صح....

رشا خليفة

Reactions:

0 التعليقات:

إرسال تعليق