تتعامل ازاي مع معارض التوظيف؟؟

ناس كتير بتسأل ....أدور علي شغل ازاي و اعمل ايه...و اروح فين

و يمكن اتكلمت عن الموضوع دا كتير اوي الفتره الي فاتت....انهارده انا عايزه اتكلم عن موضوع مهم ....

مهرجانات التوظيف ......

الحقيقه في الفتره الي فاتت من حوالي 5 سنوات كده ابتدت تنتشر اوي فكره ان الشركات تتجمع كلهم في مكان واحد ويعملو مهرجان توظيف .... اكتر مهرجانات انا فعلا بحس انه مهم اني احضره ....غرفة التجارة الامريكية ...لكن دا ميمنعش اني بحضر برضه الباقي ....لانها بتكون فعلا مفيده جدا في حاجات كتير يمكن الناس متحسش باهميتها .....

طيب أهمية الموضوع دا ايه ؟؟؟؟!!!!

الحقيقه هي مفيده لاكتر من فئة ...يعني فئة الي لسة متخرجين و بيدورو علي شغل ....فئة الي عايز يغير مجاله ...فئة الي بيشتغل فعلا ....

نشوف باه كل فئة في دول هتستفيد ازاي؟؟؟؟؟

أولا : الي لسه متخرجين جداد .....
المعارض دي بتساعدهم علي حاجتين مهمين جدا :
اول حاجه.... انهم يعرفو احتياجات السوق ايه؟؟؟والشركات بتطلب ايه؟؟؟؟ و طبعا بكده يطور من نفسه ....
ثاني حاجه ....انهم يكون عندهم فرصة يحطو السي في بتاعتهم في اكثر من مكان ...وياخدو بينات شركات كتير ويتعرف علي مراكز التدريب و التطوير ....يعني هيعرف حاجات كتيره جدا...

ثانيا : فئة الي عايز يغير مجاله ....
برضه هيبقي عنده فرصه هايله انه يقدم السي في في اكتر من مكان ...و يتعرف علي الشركات دي ...خاصه ان غالبا بيكون مسئول الاتش ار موجود ...فطبعا اتعرف و اعمل علاقات ....و اعرض خدماتي ...علاقات علاقات يعني.

ثالثا : فئة الي بيشتغل فعلا .....
غالبا في ناس كتير بتبقي بتشتغل ...و عاجبها شغلها ...و مش عايزه تغيره ...طيب ميروحش يعني و لا ايه ؟؟؟ لا الحقيقه هو هيروح ...بس هيروح علشان يتعرف علي الشركات التانيه ...الي بتشتغل في نفس المجال ...يتعرف علي ايه الجديد في السوق ...ممكن يطلع بفكره يطور بيها شغله هو شخصيا ...و يتعرف علي ناس جديده يعني الهدف هيبقي علاقات عامة ...و تطوير .....
دا غير انه ممكن يتعرف علي احتياجات الشركات ايه ...يعني لو بيشتغل في المبيعات مثلا ممكن يفتح لنفسه اسواق جديده ...و لو بيدرب ممكن يقدملهم خدمات تدريبية ...أو علي الاقل يتعرف علي طلبات السوق ايه ؟؟؟

طيب أعرف منين باه أخبار المعارض دي؟؟؟؟و اجيبها منين ......

1- متابعة الجرايد و المجلات الي بتهتم بالتوظيف .....
2- متابعة الانترنت ...يعني اعمل بحث كل مده اخبار معارض التوظيف ايه؟؟؟؟و فين ؟؟؟؟و مين عاملها؟؟؟؟
3- الجامعات ..الجمعيات الاهلية ...النوادي ....الجامعات الخاصة ...كل دول بيعملوا معارض توظيف...
4- متابعة كل الاماكن الي فيها قاعات ...قاعة المؤتمرات ..دار الاوبرا ...الخ.

أعمل ايه باه علشان اروح.....

1- اكتب سي في كويسة ....
2- اعمل منها نسخ كتير لان هناك بيكون تصوير النسخ غالي ....يعني 30 ل 40 نسخة من السي في بتاعتي ...
3- اروح اعمل تسجيل بره الاول ....و اكتب اني احب يبعتولي لما يكون فيه معارض زي دي في المستقبل ...
4- ادخل الف لفة ..ادرس فيها الموقف ...يعني اشوف كل الشركات و اخد فكره عن الوظائف ...
5- بعدين اروح عند مكان مكان ...اتعرف عليهم ...اقدم السي في ...اسالهم عن الاسئلة الي نفسي فيها...اعرف المعلومات ...مين المسؤول عن ايه؟؟؟
6- بعد المعرض ...ابعت للناس الي اتعرفت عليهم ....اشكرهم علي وقتهم ...

الحقيقه ...دي حاجه من الحاجات الي الواحد بيعملها علشان يقدر يوصل للي بيحلم بيه ....مستنيه رايكم ....و اشوفكم يزم السبت من الساعة 12 ان شاء الله في ملتقي التوظيف لغرفة التجارة الامريكية ...فندق كونراد كورنيش النيل ...المعرض ايام 19 و 20 ديسمبر 2009 ...الي عايز يعرف معلومات أكتر ...يدخل علي موقع غرفة التجارة الامريكية ...

أشوفكم علي خير ....رشا خليفة