الاثنين، يناير 18، 2010

معاد مع شغلانة الأحلام

بناء علي طلب الجماهير العريضة و بعد طول غياب ,,,,, نتكلم النهارده عن المقابلة الشخصية ....لو تفتكرو معاي من فترة كنت كتبت نوت ,,و اتكلمت فيها عن السلبيات الي شفتها من شباب مقدمة علي شغل ....انهارده انا هتكلم معاكو في نعمل ايه علشان المقابلة الشخصية تكون ناجحة ...

فيه مقوله دايما ..مش عارفه مين الي اخترعها ...لكن بتقول ايه ؟؟؟؟ الانطباع الاول ....يدوم ....

بين مؤيد و معارض ...لكن خلينا نقول ان في المقابلة الشخصية الانطباع الاول دائما يدوم ....مفيش فرصه تانيه الحقيقه ....لان هي مره واحده ...يا صابت ....يا ان شاء الله صابت برضه.....

و علشان كده المفروض علينا ناخد بالنا جدا ....و نركز .....و نبقي عارفين احنا بنعمل ايه؟؟؟؟؟

أول حاجه ....كن مستعد ...

يعني اعمل ايه يعني؟؟؟؟ و لا حاجه بسيطه جدا ...لما الشركة تتصل بيك علشان تحددلك معاد تسأل الأسئلة دي ..مننساش ورقة وقلم جنبك علشان تكتب المعلومات الي هيقولوها.
1- انتو جبتو السي في بتاعتي من فين ؟؟؟؟
2- الشركة اسمها ايه ؟؟؟
3- عندكو موقع علي الانترنت؟؟؟؟
4- انا هقابل مين ؟؟؟؟ ووظيفته ايه؟؟؟
بعد ما سالت الاسئلة .....اقعد اذاكرها ....يعني ادخل علي الانترنت ...اعرف اخبار الشركة دي ايه؟؟؟ووزنها ايه في السوق ..و مده عملها ....و مين صاحبها ...ليها فروع و لا لا ؟؟؟؟كده يعني.....

ثاني حاجه ....اللبس ..و الشياكه و الاناقة ...

يعني الولاد ...تلبس كلاسيك مش لازم بدلة ...لكن ممكن بنطلون قماش و قميص بسيط ...البنات بأه لان دول الطمه الكبري ...يا بنويت يا حلوين ...احنا رايحين مقابلة مش فرح ...يعني الماكياج خفيف ...و اللبس بسيط و غامق ...يعني الوان الرمادي – الاسود – البني ...الخ ...بلاش الالوان الفاتحة ...و الشوز لازم يكون مقفول ...مش صندل يعني ...صيف أو شتا ملهمش دعوة ...لازم شوز مقفول...
البرفان ....بلاش البرفان يكون ريحته قويه اوي ...يعني يكون هادي ... و مش كتير سواء ولاد أو بنات...
ناخد بالنا من ريحة النفس ....يعني كلورتس قبل ما نطلع المقابله ....بس مندخلش بيه المقابله طبعا ...!!!!

ثالث حاجه .....اروح بدري قبل معادي بربع ساعة ...دا هيخليني اخد علي

رابع حاجه ....نرتب اولوياتنا .....

يعني قبل ما ادخل المقابلة اكون محدد انا عايز اشتغل ايه ...و ليه؟؟؟؟ لان دا هيساعدك توصل للي انت عايزه .. ومش هيخليك قلقان او متوتر ... و كمان يخليك تركز علي مهاراتك و امكانياك ..ويخليك تجاوب علي الاسئلة بدقة و بشكل كويس كمان ...بالنسبة للاجابة علي الاسئلة يا ريت تكون مباشرة ...و من غير رغي كتير ....يعني خش في الموضوع ....

خامس حاجه ....لازم تكون محدد معاهم المرتب بس بطريقه غير مباشرة ....يعني حط توقعات للمرتب الي انت عايزه او مثلا ...انا مش هقبل باقل من كذا ...متخفش ...الي في نصيبك هيصيبك ...لكن لازم تكون محدد.

سادس حاجه ....بلاش الدخول في مواضيع فيها جدال .. زي فرق الكورة ..المذاهب الدينية ...الخ ملناش دعوة بالمواضيع دي و لو اتسالت تجاوب بشياكه ..يعني بشجع اللعبة الحلوة ...كده يعني.

سابع حاجه و دي مهمه جدا ......أوعي تكدب ....جاوب بصراحة و من غير لف ودوران.

ثامن حاجه ....لازم تقفل تليفونك قبل ما تدخل المقابلة ...اوعي يرن و انت قاعد مع الناس ...عيب ميصحش خالص

تاسع حاجه ... متنساش تاخد من الي قابلته ...كارت شخصي ...دا مهم جدا ....

عاشر حاجه ... بعد المقابله ....تبعت رساله لطيفة ...للانسان الي انت قابلته ...تشكره علي وقته ...و تفكره بيك ...علي فكره الرساله دي بتفرق كتير مع الشركات ...أو مع الشخص الي انت قابلته ....

و ربنا معاكم يا رب ....و يوفقكم جميعا

رشا خليفة

0 التعليقات:

إرسال تعليق