الأربعاء، يناير 20، 2010

قاعدة صحاب مع رشا ...و هنبقي نتصل بيك

 مصطفي أحمد ....شاب في مقتبل العمر ...مره من ذات المرات و تحديدا ...يوم الأربعاء الموافق 2 ديمسبر 2009 ...قعدت انا ومصطفي نتناقش في الهدف من جروب رشا تيبس ايه؟؟؟؟ و ايه الفايده من اني اسمع نصايحك و اصلا البلد مفيهاش شغل ...و الواسطه عامله عمايلها و كلام كبير كده ...يعني نقاش طويل قعدنا نتكلم يجي ساعتين ...و انا اقنعة طب بس قولي ايه الي حصل .. و اقوله طب جربت تبعت لشركات ...طب رحت تعمل مقابلات .....الخ المهم في اليوم دا كتبت التوبيك بتاع "شغلانة الأحلام تعمل ايه و تجيلك أوام" الحقيقه مكنتش اعرف ان التوبيك هيعجب الناس كده ...

نرجع لمصطفي ...من 2 ديسمبر لحد الخميس الموافق 24 ديسمبر 2009 و مصطفي بيحاول يدور علي شغل بس بطريقه جديده و مختلفة .... خلينا فاكرين ان اول نقاش مع مصطفي يوم 2 ديسمبر كان بيقول فيه ....
البلد مفيهاش شغل ....الواسطه تكسب ... انا بدور و محدش بيكلمني ...

كلمني مصطفي يوم 24 ديسمبر 2009 و قالي ...رشا ...البلد فيها شغل ...بس محتاجه مجهود علشان نقدر نوصل للي احنا عايزينة ... الي جاي دا مش كلامي ...دا كلام مصطفي ...الشاب الي أتخرج من الجامعة ...و خلص الجيش ...و ملقاش شغل ...

مصطفي كتب بعنوان " هنبقي نتصل بيك "

وقال ..............

اولا. السلام عليكم ورحمة الله وبركاته

هنبقى نتصل بيك كلمة بنسمعها كتير فى اخر المقابلة

طبعا انا اول مرة انزل توبيك فى الجروب ده بس انا هتكلم عنى نبذة صغيرة كدا على السريع لان فى ناس بتكره القراءة الكثيرة بس حبيت اقولها للشباب اللى بدور على شغل.... انا اسمى (مصطفى ) خريج ادارة اعمال انا لما خلصت تعليم بجد خلصت مكنتش اعرف يعنى ايه ادارة اعمال ولا محاسبة بس انا من صغرى احب الرياضة والحاسابات قلت اخد قرص محاسبة علشان افهم يعنى ايه محاسبة اخدت القرص وفهمته حاجات كتيرة يعنى لان اول مرة يعتبر اخد محاسبة المهم عن طريق ناس جالى عقد كويس محاسب فى الامارات بس كنت بشوف الجيش ساعتها فا محصلش نصيب.

ودخلت الجيش حسيت ساعتها ان خلاص قفلت معايا المهم الجيش عدة عليا بسرعة محاستش بيه بعد ما خلصت جيش نسيت المحاسبة مش فاكر اوى قولت هدور على شغل ....

المهم لقيت شركة طالبة محاسبين المهم عملت مقابلة فيها بصراحة مكنتش كويس فى المقابلة قالولي هنبقى نتصل بيك ......

بعدها قولت انا هشوف شغل فى المبيعات فى شركة كوكاكولا روحت عملت المقابلة مع مدير المبيعات حسيت بردو من مقابلته معايا انا موافقتش فى المقابلة قال ان هنتصل بيك...... قولت اشوف ممكن يكون طالبين محاسبين فا قدمت السى فى بتاعى هناك وروحت عملت المقابلة قلى على حاجة فى الاكسل معرفتهاش قلى بردو هنتصل بيك .......

المهم بعد ما خرجت من عنده على طول مروحتش قولت لازم اخد دورة فى icdl اخذت الدورة قولت اشوف تانى ....

لقيت شغل كدا بمرتب ضعيف جدا مش محاسبة اوى قلت اشتغل فيها وخلاص يبقى اسمى شغال بدل ما اقعد بعد ما اشتغلت فيها بدات اكسل ادور قلت خلاص مافيش شغل ......

لحد بصراحة فى مرة كنت زهقان بجد وعايز اطلع ارفى فى اى حد لقيت استاذة رشا كانت فاتحة اميلها وانا شايف موضيعها كلها عن الشغل ومافيش شغل قولت ادخل اتكلم معها المهم .......انا كنت متعصب بجد وقعدنا نتكلم عن الوسايط وكدا لحد بصراحة لها فضل بعد ربنا قلتلى اعمل ايه ومتياس والشغل كتير ....وقلتلى اعمل ايه.... فى المقابلة فا انا لما كنت اقعد على النت كنت اجيب اميلات الشركات وابعت السى فى.....

فا كان فى مدير شركة ضفنى واتكلم معايا قبل ما اتكلم مع رشا..... بس قلتله انا معنديش خبرة فرفضنى ساعتها فا قلت لرشا..... قلتلى كلمه وقله هبدا معاك بنص مرتب عملت كدا فعلا...... طلب ان اقبله بدات اراجع على المحاسبة من جديد وعلى الكسل علشان ابقى جاهز ......قبلته فعلا قلى بردو هنتصل بيك........

بعدها بجد لقيت شركة بترول طالبة محاسبين تبع القوات المسلحة قلت اروح اشوفها المهم عملت المقابلة نجحت فيها اوى قلولى جهز ورقك وتعالى المهم جهزته وروحت رفضونى بسبب الشهادة علشان مكتوب فيها بكالوريوس ادارة اعمال .......مشيت من عندهم حسيت ان خلاص اتفقلت خالص بس الحمد لله قدرت اجيب واحد يعرف رئيس مجلس الادارة فطلب يقبلنى ....وده يوم بجد عجيب مقبلتى كانت الساعة التاسعة روحت قلولى مش موجود وهيجى 12
ضيعت وقتى لحد 12 وروحت مكنش لسة جه قالو ممكن يجى كمان نص ساعة استنيته مجاش سالتهم هو لما هيجى هيروح امتا قالو اربعة قلتلهم انا
هجيله الساعة 3 طبعا كل ده فى مصر الجديدة ومش شايف فيها اى كافتريا اقعد فيها ولا اى حاجة المهم قدرت اضيع الوقت لحد الساعة 3 كان فى مسجد قريب هناك دخلت غسلت طبعا وشى وظبط نفسى لان اتبهدلت من الصبح ورجعت الشركة لقيته جه عملت معاه المقابلة والحمد لله نجحت فيها وخد ورقى وان شاء الله هستلم من الاسبوع الجى.............

وبعدها كمان جالى شغل فى شركة من العاشر من رمضان بس طبعا انا اخترت خلاص وبجد يجماعة اللى يتعب والله ربنا مش بينسى حد بس لازم تتعب......................
.. انا اتبهدلت مش تعبت بس لازم الواحد يكون عنده عزيمة ومتخافش من المقابلة ومتهابش حد اقعد عادى جدا وحط فى بالك ان ربنا اللى بيرزقنا.

وبجد يجماعة انا عايز اشكر استاذة رشا .............لان خلتنى ارجع اتشجع من جديد وابدا الطريق الصح واعمل ايه فى المقابلة والله فى شغل كتير بس اللى يقرب من ربنا ويسعى.

لازم تتعب علشان تلاقى لو مستنى من حد ان هيشغلك يبقى مش هتشتغل طول حياتك .........او ممكن تشتغلا بس مش هتنجح ........انا اسف يجماعة لو صدعتكم الكلام كتير .

بس انا طلعت معظم اللى عندى انا فى شركات مقلتش عليها بس انا عايز للشباب حاجة متحولش تيااااس انسى الفشل وفكر فى اللى جى وادعولى ان ربنا يوفقنى فى الشغل ده .

وان شاء الله كل اللى بيدور.... على شغل هيشتغل وهيلاقى لان الشغل مافيش اكتر منه بس يكون عندك ارادة وعزيمة فى حاجة انا عايز اقولها لما تعمل مقابلة وتسال يقولك انتا اشتغلت قبل كدا متقلش لا قول ايوة اشتغلت وقفت فى محل اكسسوارات محل ملابس اى حاجة وخلاص لان لما بتقول مشتغلش خالص المدير يخاف منك ومتهابش حد فى المقابلة اتكلم عادى جدا وانا اسف يجماعة ان طولت عليكم وانا عارف ان مش منسق الكلام كويس بس طلعت اللى عندى بطرقتى وانا بشكر رشاااااااااااا جداااااااااا

و شهد شاهد من أهلها ....انا قلت فيه شغل ...بس نحاول ....و ندور .....و جرب..... و نتعب .... و علي قد ما نتعب ربنا هيجازينا ...
مصطفي ميرسي علي انك حققت حلمي ... كنت بحلم بشباب ...محدد هو عايز ايه ؟؟؟ و عارف عايز يشتغل ايه ؟؟؟؟ و مصمم علي رأيه ؟؟؟ و محدد اتجهاته .....علشان يقدر يوصل .....

دا لينك وظيفة الاحلام تعمل ايه و تجيلك اوام .... اتذاع علي إذاعة جمهورية مصر العربية يوم الخميس 17 ديسمبر 2009 ..برنامج انت تسأل و الكمبيوتر يجيب ....

http://www.facebook.com/rkhalifa?v=app_2392950137#/video/video.php?v=234151128693

دا لينك النوت الأصلي علي الول.... بقلم مصطفي أحمد ..
http://www.facebook.com/#/topic.php?uid=101642403015&topic=13934

قاعدة صحاب ....مع رشا خليفة

رشا خليفة

Reactions:

1 التعليقات:

إرسال تعليق