الاثنين، يناير 18، 2010

كتر السلام ..يقل المعرفة؟؟


من حوالي 10 سنين اتعرفت علي صديقتي أنوج ... كانت لما تيجي تنام تقفل الموبايل و ترفع سماعة البيت ....خير يا بنتي ليه كده ...تقولي ..لما بنام او بكون مشغوله بقفل التليفونات .... أنا طبعا متوصاش ...أمسكها تريقة و اقول عامله مهمه يعني ....و تقفلي التليفون ...و تعملي مش عارف ايه ....

الحقيقه انا عمري مقفلت تليفوني ....و لا طلعت علي الشات عامله نفسي انفيزابل .... و كنت دايما بحس ان الي بيعمل كده يعني ...بيتكبر ...و عايز يحس انه مهم ....

لحد أمبارح ...... كل دا اتغير ....

ايه الي حصل باه ......

قبل ما احكيلكو ايه الي حصل ...عايزه اعرفكم ....انا هنا ..بعمل ايه؟؟؟؟؟؟

أنا رشا خليفة ... بني ادمه عادية جدا ...و أقل من العادي كمان ... بس كل واحد ربنا اداله هبه و مهاره ... واجبه انه يحمد ربنا عليها ... ربنا اداني مهاره اني اشتغل كويس .... من 13 سنة ودي اكتر حاجه انا ناجحه فيها ...و بعرف اعملها .... في يوم كده قلت طب ...من الي اتعلمته في ال 13 سنة دول ... و البهدله الي اتبهدلتها علشان اشتغل و اتنقل من شغلانه لشغلانه .... انقل خبرتي دي للشباب و البنات علي الفيس بوك ...و عملت جروب ...و قلت اساعد الناس ... ليه لا يعني ....دا حتي بدل ما البنت من دول تقعد علي الانترنت تعمل شات ....و لا الولد يدور علي بنات يصاحبها ...يقرا حاجه مفيده ....

طيب ايه الي حصل باه .....

أولا انا كاتبه قصة حياتي علي البروفايل ...مين و ساكنه فين ..و مرتبطة و لا لا ...و بشتغل فين ....والصور محطوته يعني كل ما يتمناه اي حد ....هيلاقيه في البروفايل.....

تلاقي ايه بأه .....

ناس تدخل ....لمجرد انهم يتعرفو و خلصنا .....يعني تهريج و خلاص..... بجد غريب عجيب !!!!!

ناس تانيه داخلة علشان المواضيع ....الي مش عارف ايه ....الي كلنا عارفينها .... و مش بياخد باله اني محجبه ...وبتكلم باحترام .... و حد محترم ....لا دا خل و خلاص و يا صابت ....يا خابت .... برضه غريب عجيب !!!!

ناس بأه محترمة و كل حاجه .....لكن متراعيش الظروف .....يعني متخيله انك طالما اون لاين ...يبقي خلاص ...
مش يراعي مثلا انه اون لاين بس ممكن ميبقاش علي الجهاز ....

بيشتغل مثلا ...فمش عارف يرد !!!! بتحصل .... لا ادام بعتلك هاي .....يبقي غصب عنك ترد عليا .... و لو مردتش .... الدنيا تتقلب ....بجد بجد ...شيء عجيب !!!!

نيجي بأه للي حصل امبارح ....واحد قابلني علي الشات ...بعتلي رساله انا عايز اتصل بيكي ضروري ...اديني رقمك ...افتكرت انه حد من اعضاء الجروب ...وعنده مشكله ولازم يكلمني...بعتله النمره ....رد عليا انتي بتهرجي ....قلت لا ...دا رقمي .....

امهم اتصل بيا ....و كنت لسه خارجه من اجتماع مع مديري ...و بقفل مكتبي علشان اروح ...و كمان اخويا مستنيني في الشارع نروح سوا .... رديت ...أهلا وسهلا ... الحقيقه انا مش مصدق انك اديتيلي رقمك ...قلت لا عادي .... بس هو ايه المشكله؟؟؟؟؟ انا عايز اتعرف عليكي ....طيب أهلا بيك ....و اتمني تقرا التوبيك الي بكتبها ... و تستفيد ....طيب انا ممكن اقابلك ....رديت بادب طبعا ....فيه صالون للجروب يوم 8 يناير في وسط البلد ....شرفنا ....و هنتكلم عن ازاي تسوق نفسك .... والموبايل فصل شحن ..... فتحت الموبايل ....اتصل تاني قلتله علي فكره ....موبايلي مفيهوش شحن ...معلش لما اشحن هبقي اكلمك ....طيب انا بعزمك علي كتب كتابي ....قلت الف مبروك... و لو الوقت سمح ان شاء الله اجي ..... كل دا و انا فارضه حسن النية ....
نزلت من العربيه و سيبت التليفون .....قعد يتصل ....يتصل ....ناسيه الموبيال في العربيه ... بعتلي رساله ....انتي مبترديش عليا ليه .... ؟؟؟؟؟؟

روحت و حطيت التليفون في الشحن .... بفتح لقيت رسالتين .... انا بتصل بيكي ... و انتي قفلتي تليفونك ؟؟؟ و اتصل بيا صديقه بتكلمني في موضوع فعلا مهم .... و السيد الفاضل عمال يتصل ....رديت ..... معلش انا معايا مكالمه مهمه اخلصها و اكلمك ..... المهم عايزه انام علشان عندي شغل بكره ....لأول مره في حياتي ...اقفل تليفوني متعمده ... ونمت ..صحيت من النوم ...رساله ...انتي قفلتي تليفونك ..كل دا علشان قلتلك اني هكتب كتابي ....انتي كنتي فاكره ايه؟؟؟؟؟

الحقيقه انا مش فاكره حاجه .......

علشان كده النهارده انا جايه اقولكم انا جايه هنا اعمل ايه؟؟؟؟؟؟؟؟؟

انا عندي خبره 13 سنة ....شغل .... عايزه اساعد الناس .....بخبرتي ....غريبه دي يعني ؟؟؟؟
انا شايفه أن الشباب ... محتاجين حد يدلهم علي الطريق الصح علشان يبتدو حياتهم العملية ..... عايزه الناس تشق طريقها غلطانه انا ؟؟؟؟؟؟..

أنا أخدت كورسات و ماجستير ....و شايفه ان فايده العلم ..... لما نفيد بيه غيرنا ......مستغربين ليه؟؟؟؟؟

بجد فيه بنات علي الفيس بوك عايزين يفيدو غيرهم .....بتحصل و الله ....

بجد فيه بنات علي الفيس بوك ...محترمين ... و مش همهم خروجه و فسحه ....مع واحد ....

بجد فيه بنات علي الفيس بوك ....... نفسهم يعملوا حاجه في حياتهم ......

بجد فيه بنات علي الفيس بوك ...... نفسهم يتعاملو بأحترام .... صدقوني فيه ....

ممكن تساعدوهم؟؟؟؟

ممكن تحترموهم ؟؟؟؟

ممكن متفهموهمش غلط ؟؟؟؟؟

مش حاسه اني بطلب حاجه صعبه ؟؟؟؟

و لا احترام الاخر ...و حسن المعامله ....بقت من الأثار الي هنشوفها في المتاحف بعد كده؟؟؟؟

يا جماعة ....كتر السلام يقل المعرفه .... و يا بخت من زار وخفف ....بلاش تزن ...... و طبعا الكلام للولاد .....مش معني انك لقيت بنت اون لاين ....تبقي بنت مش عارف ايه ....و الله محترمين ...!!!!

أنا قلت انا بعمل ايه علي الفيس بوك ......انتو باه بتعملو ايه؟؟؟؟؟؟؟؟

رشا خليفة

Reactions:

1 التعليقات:

إرسال تعليق