الأربعاء، يناير 20، 2010

شيء غريب عجيب

شيء عجيب غريب ....الكلمة دي كان دايما يقولها مدير ليا زمان ...كان أجنبي ...و تقريبا دي الكلمة العربي الوحيده الي عارفها ...لانفي كل المواقف الي يتعرض ليها .....يخرج يا عيني يضرب كف علي كف و يقول .....شيء عجيب غريب .....كنت بضحك و اقول انه ما صدق يتعلم كلمة عربي ..... انهارده انا بقول ....شيء عجيب غريب !!!!!

الحقيقه زي ما عودتكم دايما أني أكتب حاجه ليها علاقة بالواقع الي احنا كلنا عايشينة ....بقالنا مدة بنتكلم عن موضوع الشغل و ندور علي شغل ازاي ؟؟؟و نروح فين ...و نكلم مين ....و الحقيقه من وجهة نظري المتواضعة ...الموضوع دا قتل بحثا ....يعني اتكلمت فيه كتير ...دا غير السي في و نكتبها ازاي ...الحقيقه عايزين نخش علي موضوع جديد بأه.....

المقابلة الشخصية

....الشركة جالها السي في بتاعك ....و اتصلو بيك علشان تعمل انتر فيو ....الحقيقه الموضوع دا هنتكلم فيه علي مرتين المرة الاولي( انهارده يعني ) ...هنتكلم عن الاخطاء الي شفتها بعيني ...المره الثانية المفروض نعمل ايه؟؟؟؟!!!!!

الاخطاء ....قبل ما نبتدي نتكلم ...دي مش تريقة و لا سخرية من أحد ....لكن أحنا بنتكلم هنا بحرية علشان نتعلم!!!

الاسبوع الي فات عملت اعلان طلبت فيه وظايف معينه للشركة الي بشتغل فيها ...و بعد ما أستقبلت السيفيهات وطلعت منها الناس الي مناسبين للوظيفة ...المفروض اني ادي السيفيهات للسكرتاريه علشان يتصلوا بالناس يحددو مواعيد ....لكن انا أتصلت بنفسي ...كنت عايزه اعرف الناس هتتصرف ازاي؟؟؟؟؟ و كانت التصرفات كالتالي :

1- مفيش حد من الي اتصلت بيهم سألني هي الشركة دي بتشتغل في مجال ايه؟؟؟؟؟
2- مفيش حد من الي اتصلت بيهم سألني انتو عندكو موقع الكتروني و لا لا؟؟؟؟
3- مفيش حد سألني هي الشركة دولية و لا مصرية؟؟؟؟
4- مفيش حد سألني أنا هقابل مين؟؟؟؟؟ ووظيفته ايه؟؟؟؟
5- مفيش حد سأل هل دي مقابله علي طول و لا فيه اختبارات ؟؟؟؟ولو فيه اختبارات ايه هي؟؟؟
6- يوم المقابله ....واحد جالي لابس جينز و تي شيرت ......غريبة دي !!!!
7- 3 من الي المفروض اقابلهم جم بعد الشركة ما قفلت أصلا ......بس الحمد لله كان عندهم فرصة لمقابلة الاوفيس بوي....
8- الغريب بأه ....واحد ...جه قالي انا جيت بس مش عارف أصلا انتو جبتو السي في منين ...و مين بعتها ..أنا صالا مبعتش السي في لحد ؟؟؟و لما اتصلتو قلت اجي اشوف الجو .....أحترمت صراحته ......

بعد الي كتبته دا... ......نو كومنت ...
التوبيك الجاي ....الكتاب بيقول ايه علشان ننجح في المقابله الشخصية.... يا ريت نسمع ...و نعمل ...علشان نبقي أحسن....
رشا خليفة

Reactions:

0 التعليقات:

إرسال تعليق