انا خريج كلية زراعة دفعة 2008 بس انا مش حابب موضوع مهندس زراعي دا وبحب الشغل الإداري والمكتبي بس طبعا مش عارف إية طبيعة الشغل أو المسميات الوظيفية لأني بكل بساطة بتكسف أساس في حاجة إن حد يتريق عليا ومحاولتش اخد كورسات لأن الكلام اللي إتقالي أن الكورسات دي كلام ف الفاضي.
عشان كدا انا بسأل حضرتك إبة المسميات الوظيفية وإزاي اتواصل مع الشركات القريبة مني يعني ف الشرقية والإسماعيلية والقاهرة دول أقرب المحافظات ليا بس دا طبعا بعد ماعرف انا المفروض اعمل إية لأني تعبت وبأمانة محدش فاهمني وكل لما اكلم حد يدخلي ف قصص وف موضوعات وشغل كذا وكذا وانا مش حابب الحاجات اللي بيقولوها انا عاوز الحاجة اللي انا بحبها واللي انا عاوزها بس لا أكتر ولا أقل
هل دا ممكن ؟؟؟؟؟
هكون مبسوط لو رديتي عليا وعرفتيني انا ممكن أعمل إية عشان أنا مش عارف وحاسس إني تايه ومحبط ونفسي اسيب البلد دي عشان محدش بقي فاهمني
دا سببة انك من البداية اخترت تخصص انت مش بتحبة .... يعني اخترت تخش كلية زراعة و انت بتحب الادارة .... طب مدخلتش تجارة ليه؟؟؟؟؟من الأول ....
بالنسبة للمسميات الوظيفية .... بسيطة جدا انت تندخل علي جوجل .... وتعمل بحث عن الهيكل الوظيفي للشركات واعمل بحث عن المسميات الوظيفية وكمان التوصيف الوظيفي بتاعها (JOB DESCRIPTION) .
التوصيف الوظيفي دا فيه كل ما تحتاجه الوظيفة من حيث الدراسة والمعارف والمهارات المطلوبة وكمان المهام والمسئوليات الي بقوم بيها الموظف في الوظيفة دي .
بكده نكون حلينا موضوع انت تشتغل ايه؟؟؟؟
طيب علشان تشتغل ..... المفروض يكون عندك حاجه من اثنين (علم كبير ) أو ( خبرة كبيرة).
طب هتجيبهم منين .....
العلم هيجي من ( الدراسة - الكورسات - القراءة والأطلاع )
الخبرة هتيجي من الشغل ملهاش حل تاني .
اصحابك بيقولو متاخدش كورسات علشان ملهاش فايدة ..... دا كلام مش صح ابدا ....
الكورسات ملهاش فايدة لو انت مش بتتعلم منها حاجه جديدة او انها في مجال مش هتشتغلة .
طيب اعرف ازاي الكورس المفيد من الكورس الي مش مفيد دا ممكن اقولك تعمله ازاي؟؟؟
- طبعا اول حاجه نوع الكورس ( وهل هو هيفيدني في عملي ام لا).
- الجهة الي مقدمة الكورس .... هل هي شركة ليها اسم ولا واحد فكر يعمل مركز تدريب فاجر شقة في عمارة.
- المدرب ..... اعمل بحث عن المدرب اعرف هو بيدرس ايه بالظبط و خلفيته العلمية كطلها ايه؟؟؟؟ يعني مثلا اعلان بيقول ان احمس عامل كورس تسويق .... اجي ادور علي أحمس الاقي انه متخرج من سياحة وفنادق ومشتغلش قبل كده في التسويق ولا مارس الموضوع بشكل عملي واصلا هو متخرج دفعة السنى الي فاتت .... دا مهاما كان مذاكر كويس ينقصة الخبرة العملية الي ليها اهمية كبيرة في التدريب .
لو فكرت بالطريقة دي قبل اي كورس محتاجه ..... ان شاء الله توصل للي انت عايزه ....
بالنسبة للشركات .... عندك العاشر من رمضان .... اقرب و فيها شركات كتير وكبيرة وكل حاجة والعبور كمان منطقة صناعية مفيش اكبر من كده ..... دول علي دليل الشركات في المدينتين دول و هتوصل للي انت عايزه انشاء الله
0 التعليقات:
إرسال تعليق