الأربعاء، ديسمبر 29، 2010

اتعب دلوقت ....و استريح بعدين

سلام عليكم...انا عبدالحميد وعندي 23 سنه..حاسس اني مأنجزتش حاجه فحياتي وحاسس انها ماشيه ببطء جدا..

انا معايا بكالريوس نظم معلومات اداريه...واشتغلت جرافيك ديزاينر في شركه IT فالمنصوره طول فتره دراستي...وحبيت اشتغل فمجال ال3D والانيميشن



واعمل كرتون وحاجات من دي..وفعلا سافرت القاهره وصرفت تقريبا كل الفلوس الي معايا علشان اقدر اقعد فشقه واخدت الكورس في شركه ليها سمعتها فالمجال ده..بس للاسف اضحك عليا لأني مأخدتش اي حاجه ليها علاقه بالانيميشن وكنت دفعت اكتر من 80 فالميه من تمن الكورس..وققرت اكمله وخلاص اهو اقدر اعمل تصميمات ديكور وحاجات من دي...


المهم بعد ماخلصت الكورس الي مدته كانت 6 شهور..عملت لنفسي demo reel ودورت بيه علي الشركات..فكل شركه كانت ترد عليا كانت عايزه افتر ايفيكت مع الماكس علشان انفع اشتغل في شركات اعلانات...قلت ماشي..كملت وفضلت قاعد فالقاهره وجبت فيديوهات علشان مقدرش علي كورس تاني وذاكرت افتر ايفيكت وعملت ديموريل محترم..لحد ما سبحان الله فشهر 5 الي فات كلمتني شركه بتاعه انيميشن وقالولي هانعلمك انيميشن وهاتشتغل معانا..قلت فرصتي وجت لحد عندي ورضيت بالمرتب القليل الي كان 1000 جنيه..قليل قصاد المجهود الي ببذله في الانيميشن والتحريك وساعات الشغل...

فضلت الاوضاع مستقره وقلت اكيد هايجي اليوم الي اقدر اتنقل فشركه تانيه وتكون خبرتي اكتر فيوافقوا يشغلوني وبمرتب كويس زي مرتبات الانيميتورز في مصر...المهم نزل مسلسل في رمضان واتعرض علي القناه والحمدلله..بس الشركه فلست لأن القناه مدفعتش حقوق الشركه دي !!...

وفصلتنا الشركه...قلت مش مشكله انا دلوقتي خبرتي اكبر والحمدلله انا متميز قوي فالانيميشن...عملت لنفسي ديمو ريل تاني بس انيميشن خاص بيا ولقطات من المسلسل...وبدأت ادور علي الشركات وابعتلها..الناس بيقلولي الشغل كويس وعاجبهم بس للأسف مفسش مكان عندهم...سواء ايميلات بتجيلي لو بعتلهم بالايميل..او الي اتصلت بيهم واخدت ميعاد وقابلت اصحاب الشركات دي....الفكره دلوقتي اني خاطب..ولازم اتجوز علشان مينفعش اعلق خطيبتي معايا اكتر من كده..

ومكسوف جدا اني مش بشتغل واني مبنجزش اي حاجه..حتي احلامي مبقيتش عارف اسيطر عليها او احققها زي مانا عايز...بتتسرق مني كل شويه...خايف...عندي طموحات وفنفس الوقت محتاج فلوس علشان اعرف اعيش اصلا...فدلوقتي ...اغير مجالي وادور فحاجه تانيه زي المحاسبه مثلا لأن معروض عليا من واحد معرفه انه يدربني ويشغلني...بس محاسب...وكده هايبقي احلامي الي كنت بدور عليها ورسالتي الي نفسي اعملها قبل ماموت مش هاتحقق..

فبقول لنفسي حاجه...انا ممكن اشتغل مع الراجل ده الي هو فالمنصوره اصلا واسيب القاهره وارجع المنصوره..وفنفس الوقت ابعت للشركات بتاعه الانيميشن برضو وافضل متابع معاهم واشتغل فري لانس..وفنفس الوقت برضو ادور عندنا فالمنصوره علي المراكز الي بتعلم ثري دي..وكمان مفيش حد بيعلم انيميشن فممكن اعرض عليهم اني اقدر ادرس انيميشن فالمنصوره ودي تبقي حاجه جديده هناك وتفتح سكه لمجالي..وابقي شغال فالمجالين...اقدر اجيب فلوس من هنا..ومن الناحيه التانيه احقق احلامي التانيه..واكمل فهدفي برضو الي هو الانيميشن......

عايز رأيك ضروري قوي لأني خايف ومحتار ومش عارف اخد قرار..لأني خايف اخده واسيب القاهره وارجع اندم علي القرارات دي....مستني ردك وآسف علي الاطاله عليكي...وانا هافضل متابع لحد ماشوف ردك لو اتكرمتي بردك...متشكر ليكي جدا انك سايبالنا المساحه دي اننا نقدر نتكلم معاكي فيها..لأني فعلا معرفتش اقول كل الي جوايا الا لحضرتك...وجزاك الله خيرا عنا ...

عبدالحميد 28-12-2010

أطالة ايه بس يا عبد الحميد ..... دا انا الي بعد كده هبعت اخد منك نصايح للجروب ...
بسم الله ما شاء الله .... عندك رسالة واضحة و عارف انت عايز ايه .... ودا مش موجود كتير ... دا قليل جدا دلوقت ...

انت عايز رايي .... خلينا نحدد الأول احتياجاتك ايه؟؟؟
  1. فلوس علشان انت خاطب ..... 
  2. عايز تدرس أكثر في المجالي الي بتحبة .
  3. عايز تكمل في مجالك ...
انا رأيي ان مجالك دا عباره عن ابداع وموهبة في المقام الأول .... ويثقل بالدراسة الي هي الكورسات والحجات التانية... و الكورسات دي برضو محتاجه فلوس .... يبقي مفيس غير انك تقبل بالحل الي معروض عليك .... انك تشتغل في المنصورة وعلي الاقل هتوفر مصاريف الاقامة في القاهرة و تخطب و تتجوز و ربنا يوفقك ان شاء الله....

نتكلم عن الموهبه ..... انا شايفه اننا نوسع النطاق شويتين .... يعني ممكن تعمل ايه ... هديلك شوية افكار تساعدك...
  1. انك تعمل لنفسك profile  علي الشبكات الأجتماعية بالنشاط بتاعك الي هو ( تدريب و تصميم النيميشن ).
  2. تعمل موقع الكتروني او مدونة حتي فيها نماذج من الشغل( طبعا الحجات الي اتعرضت) بتاعك ( بالانجليزي) علشان التارجت اصبح داخل وخارج مصر .
  3. ممكن تعمل كمان قناه الي YouTube فيها بعض الأعمال البسيطه لتحقيق الأنتشار برضه.
  4. تبتدي توزع اعلانات الكورسات بتاعتك و توزعها علي مؤسسات التدريب المختلفة داخل وخارج المنصورة و تعمل اعلانات علي الصفحة بتاعتك في الشبكات الاجتماعية زي الفيس بوك وغيره باسم الكورس و الامكان الي بتقدمه و بكده الناس هتروح تطلب الكورس من شركة التدريب و هم يكلموك علشان تيجي تدرسه بمقابل انت بتحدده مع الشركات دي .
  5. كمان تعرض امكانية انك تدرس الكورسات عبر الأنترنت ..... للناس الي خارج مصر و الناس الي في محافظات بعيده عنك من خلال Skype مثلا ... و هم يحولولك سعر الكورس علي حساب بنك او بحوالة بريدية او اي شيء .
كل الافكار الي انا قلتها دي  ماشيه في نفس الأتجاه الي انت بتفكر فيه .... يمكن بس علش نطاق اوسع ... و هي هتاخد وقت ومجهود منك يعني هتتعب لحد بما تعمل لنفسك اسم .... وبعد كده المؤسساتو الشركات هي الي هتدور عليك علشان تستفيد من خبراتك ... انا شخصيا حصل معايا كده .... قعدت مده طويلة بشرح انا بعمل ايه ... و بعد كده بقت الشركات هي الي بتكلمني علشان اتعاون معاها :)
مش هكدب عليك و اقولك ان الطريق مفروش بالورود .... الطريق فيه صعاب وقد تواجهك مشاكل وهتتعب اوي اوي .... بس لو متعبناش و احنا شباب .... هنتعب امتي ؟؟؟؟؟
اتعب دلوقت ... علشان ترتاح بعدين :)

Reactions:

0 التعليقات:

إرسال تعليق