يارشا .. أنا بحييكى على مجهودك الكبير اللى انتى عامله على الجروبات بتاعتك . رشا عندى إستفسار .. أنا عندى حلم وإن شاء الله هيتحقق إن يبقى عندى شركة صغيرة للاستيراد والتصدير إن شاء الله .. ففكرت فى الخطوات اللى توصلنى للحلم لاقيت انى محتاج اعرف كل حاجة عن قوانين لاستيراد والتصدير واعرف اللعبة ماشية إزاى .. تمام ..
فقولت إنى أشتغل الاول فى شركة تخليص جمركى كا أول خطوة فى طريقى ..تمام ..... اسنفسارى منك عن حاجتين ..
ثانيا : الوسيلة الوحيدة عشان اتواصل مع الشركات هيا انى ابعتلهم على الايميل الخاص بالشركة ... روحت رايح لصفحة يلوو بيج وعملت بحث وطلعت كل مواقع الشركات اللى عايز ابعتلهم بس قابلنى عقبة ؟؟؟ ايه محتوى الرسالة ؟؟؟ يعنى ازاى هتكون فورمل ؟؟ وبعدين عندى عقبة هيا مش عقبة اد مهيا ميزة انى لسه بدرس فى كل تجارة .. وكمان كانت عايز اكتب انى ممكن اقبل التدريب من غير مقابل بس معرفتش اعمل ده إزاى ؟؟؟؟ حابب منك لو تقوليلى اعمل ايه او تدينى مواقع تساعدنى فى ده .. انا متأكد ان رأيك هيفرق معايا .... اتمنالك دايما التوفيق ومن نجاح لنجاح على طول
يا سلام كده لما تجيلي رسايل تبعث علي الأمل علي الصبح ..... الواحد كده يصطبح برساله حلوة من دول ...
شوف يا سيدي .... دلوقت احنا لما بنخاطب الشركات بنكتب خطاب الأول اسمه Cover Letter و نرفق معاه ال CV الخطاب دا خطاب زي اي خطاب ...بشرح فيه انا براسل الشركة دي علشان ايه ... و هو عباره عن ملخص للCV بتاعتك ...اقولك ركز معايا .
- هتحدد الهدف من الراسالة ايه .
- ترجع بالزمن لورا فاكر ايام اعدادي وثانوي .... لما كانو بيعلمونا ازاي نكتب موضوع تعبير أو Paragraph في الأنجليزي كان بيقولو ايه ... حدد عناصر الموضوع في نقط محددة و بعد كده شبك العناصر مع بعض في شكل قطعة بجمل مفيدة مرتبطه ببعضها .... دا بالظبط الي بنعملة في الخطاب .
- بقسم الخطاب إلي 3 مقاطع (Paragraph ) يعني.
- كل مقطع مقسم إلي عناصر أساسية .
- كل مقطع بين 3 ل 4 أسطر ( خير الكلام ما قل ودل يعني ).
- المقطع الأول .... بتكلم فيه عن نفسي و انا مين وقدراتي ايه و امكانياتي ومهاراتي ... الخ.
- المقطع الثاني ..... بتكلم فيه عن سبب أرسالي للسالة دي و أنا عايز ايه من الشركة الي انا بعتلها و ايه الخدمات الي اقدر اقدمها ليهم .
- المقطع الثالث ..... دا فيه كيفية الأتصال بيا واني في انتظار اتصالهم عيل الميل كذا و ارقام تليفونات كذا .
3- انهاء الخطاب بتحية لطيفة - و أسمي طبعا .
4- بعد أرسال الخطاب ...مكالمة لطيفة اتأكد انه وصل .
5- بعد ارسال الخطاب بحوالي أسبوع ..... مكالمة تاني لطيفة للمتابعة وتحديد معاد للمقابلة ... وهكذا.
بالنسبة لموضوع انك لسه طالب .... أنا شايفة ان دا مفيهوش اي مشكلة خاصة انك هتكتب مستعد اشتغل ببلاش ....
1 التعليقات:
بصي يا انسه رشا انا مش هطول عليكي بس ياريت تتفضلي تسمعي كلامي للأخر لو سمحتي
انا اسمي طارق مندور
طالب في الفرقه الثالثه في قسم الرياضيات بكليه العلوم جامعه طنطا
انا خلال فتره الدراسه بحاول اشتغل برده
اشتغلت لفتره في مكتبه كبيره في طنطا كبائع ومصمم لبعض الدعايا اللي كانت بتعملها المكتبه للعملاء ( للعلم المكتبه كان ليها فرعين وانا والحمد لله لخبرتي اتنقلت في الفرعين وخلال فتره شغلي اللي هي حوالي سنه دربت أكتر من واحد علي كيفيه الشغل وهكذا .. )
وبعد فتره جالي شغل أحسن
وكان الشغل ده في توكيل شركه هابيتات اسمه ( هابيتات أحمد مصطفي ) ودا طبعا كان تخصصه في بيع المراتب الحديثه وكان ليه اكتر من فرع
ولكن للأسف مده الشغل كانت شهرين فقط وذلك لظروف شخصيه
وبعد فتره أخري فوجئت بصاحب المكتبه اللي كنت بشتغل بيها بيكلمني علي الموبايل وبيقولي عندي شغلي ليك
طبعا حددت معاه ميعاد ورحتله
المكتبه دي كانت واخده توكيل كمركز معتمد لمجله الوسيط
وكان الشغل اللي اتعرض عليا كالأتي : اني هشتغل لمندوب أو مسئول تعاقد اعلاني انا مش عارف مسماها بالظبط يعني ولكن ماهيه الشغل كانت كالآتي : اني بتنقل عند الشركات الكبيره وبعرض عليهم عروض المجله وبتعاقد معاهم علي الاعلانات
ولازلت شغال في الشغلانه دي بس بطريقه متقطعه وده لظروف المذاكره والجامعه
وفي الفتره الأخيره اهتميت بقراءة بعض الكتب عن الدعايا والاعلان وغيرها
للعلم اني عندي خبره إلي حد ما كويسه في برنامج الفوتوشوب كبرنامج تصميمي
اللي انا طالبه من حضرتك هو إجابة سؤال وطلب آخر :
1 / السؤال :
انا مش عارف المجال المتاح ليا دلوقي هو مجال الدعايا والاعلان ولا التسويق ولا المبيعات
ودا للأسف لأني مش عارف التصنيف الصحيح للأعمال اللي اشتغلتها واللي مهاراتي ترشحني ليها ؟؟
2 / الطلب :
انا بطلب من حضرتك انك تسوقيني طبقا لمهاراتي السابق ذكرها واللي بضيف عليها ( مهاره في استخدام الكمبيوتر وبرامج الأوفيس والفوتوشوب بالاضافه إلي شبه اجاده اللغه الانجليزيه ) وللأسف اني بطلب وظيفه تكون مناسبه لأني طالب جامعي
وأخيراً اشكرك علي وقتك الثمين اللي بتضحي بيه علشان تقرأي رسالتي
والسلام عليكم ورحمة الله وبركاته
إرسال تعليق