انا عايزه شغل صعب

انا اسمى اية و عندى 22 سنة حديثة التخرج من كلية التربية قسم اللغة الانجليزية بس انا مش عايزة مجال التدريس خالص.

انا اخذت كورس شامل خدمة عملاء و كميوتر و انجليش و communication skills and typing عايزة اشتغل فى شغل يكون ليه علاقة بخدمة العملاء ة الكمبيوتر و الانجليش بس المشكلة ان معظم شركات

الاتصالات عندها شيفت بالليل و انا مقدرش ارجع بالليل اوى كدة عايزة اشتغل بجد .

 و  فى شغل يكون  صعب فيه مهام كتيرة وعايزة زكاء و فهم و تحدى بس مش عايزة اى شغل يكون روتينيى (انا كدة بحب التحدى و العمل الملىء بالعمل و الجهد و التفكير )

 بس مش عارفة اعمل ايه و انا قدمت كسكرتيرة على اعتبار انها مسؤلة عن الشركة كلها بس لما قدمت لقيتهم عايزيين واحدة بتعرف تكتب بسرعة على الكمبيوتر وبس و ده مش اللى انا عايزاه ممكن اعرف اعمل ايه و ايه الشغل المناسب ليا  و لقدراتى انا اسفة طولت عليكى بس بجد عايزة حل حتى لو كان صعب انا مستعدة ليه .....سلام

يا جاااااااامد يا بتاع المهام الصعبة :)

بجد بفرح اوي بالرسائل الي زير سالتك دي .... بتفرحني كده الاقي حد عنده اصرار وعزيمة ... مبسوطه بيكي

بالنسبة لخدمة العملاء .... انت ممكن تشتغلي خدمة عملاء وتختاري الشيفتات بتاعتك ... بتظبطي مع المشرف بتاعك يعني لما تفهميه الضروف الشخصية وكده الدنيا بتمشي...

او ممكن تشتغلي خدمة عملاء وجها لوجه ... ودي مبتحتاجش مواعيد متأخرة لان معظم المؤسسات خدمة عملاء التليفون بس هي الي بتكون لوقت متأخر... كده حلينا أول حاجه ...

بالنسبة للسكرتيرة .... مش السلم بيطلعوه من أوله ؟؟؟؟؟ هي دي ... هحكيلك حكاية ...

كان فيه راجل عربي ومعاه الجمل بتاعه ... قال ينقعد يستريح .... نصب الخيمة بتاعته ودخل جواها علشان ينام ... طبعا الجمل قاعد بره في الشمس والحر.... الجمل دخل رجل واحده ... و الاعرابي اتحرك ... راح مدخل الرجل الثانية ... الاعرابي اتاخر شوية .... راح الجمل دخل الرجل الثالثة ... و الاعرابي اتاحخر شوية ... لحد ما الجمل  بقي هو الي جوا الخيمة .... و الاعرابي بره :)

دا نفس الموضوع .... تبتدي بكتابة علي الكمبيوتر ... وبعدين تاخدي مهام اكثر و اكثر و اكثر لحد ما تقولي كفااااااااية :)