ابنك علي ما تربيه .... و مديرك علي ما تعوديه

اولا : باتشرف انى باكتب على صفحتك

مش هاطول وهادخل فى السؤال ...

كيف تتغلب ارادة النجاح على سلطة الفشل ؟؟؟؟

ولانى سألت السؤال ده قبل كده فى احد ندوات التنميه البشريه الا ان الجواب لم يكن شافيا على الاطلاق

بدعوى ان السؤال غير واضح ..

احب ان اوضحه

عندما يكون من بيده السلطه الاقوى هو الشخص الفاشل

بسلبيته ورجعيته وافكاره القديمه

كيف يواجهه من يسعى الى النجاح ...بارادته ..

اشكرك

واعتذر ان اطلت

لك منى اسمى ايات الاحترام

ياااااه ايه الكلام الكبير دا .... سلطه الفشل ... و أرادة النجاح ..... كلام كبير كبير .... طبعا صعب الأجابه عليه .... مش عارفه انا حاسة و الله اعلم ؟؟؟؟ ان معني السؤال

لما يكون مديري مدير سيء و مش فاهم حاجه .... اتعامل معاه ازاي ؟؟؟؟

لو دا السؤال افتكر ممكن اجاوبك .... بس في البداية أحب أقولك اني مش مدربة تنمية بشرية .... انا متخصصة في الادارة بس ...

نخش علي الاجابة ....

أولا أنصحك تقرأ في موشوع التعامل مع فريق العمل ... هتفيدك جدا ....

ثانيا نتكلم عن المدير ........ بس مش معني ان المدير فاشل انا افشل انا كمان .... انا أذكي من ذلك سيدي .... اليك الحل ..

1-      عند الحصول علي تعليمات تاكد من انها  واضحة وصريحة ... بمعني ان أول ما تاخد المعلومات من مديرك تسأل عن التفاصيل و تخرج من عنده فاهم كل حاجه علشان ميكونش فيه مجال للخطأ .

2-      غالبا المدير الفاشل علي حد تعبيرك ... ولا بيتابع و لا بيعلق علي الشغل ... و سايب الدنيا سمك لبن تمر هندي ... طيب نعمل ايه احنا نتابع علي نفسنا ...و نرسل تقارير دورية بسير العمل ... دا بيكون اثبات اني بقوم بعملي علي اكمل وجه ... ومش مستني المدير يقولي ابعتلي تقرير ... انا الي بتابع علي نفسي.

3-      التعامل مع النوعية دي من المديرين مش شفوية .... بل كتابية ... يعني لما يطلب منك حاجه تبعتهالو مكتوبه عن طريق الميل مثلا ... دابرضه تأمين لموقفك يعني مش هيعرف يمسك عليك غلطه.

4-      أعمل شبكة دعم ؟؟؟؟ يعني علاقات عامة مع كل فريق العمل  و اكون بشوش وظريف و لطيف مع كل الناس زمايلي في الشركة و الناس الي بتعامل معاهم اعرفهم بنفسي و بشغلي .... وهم دول الي هيعملولي سمعة طيبة في المكان ... دا بيشتغل بسرعة .. دا بئشوش ... محدش بيطلب منه حاجه غير لما بينفذها علي طول ... الخ.... و بكده اما المدير يهاجمني هلاقي ناس تدافع عني ...

5-      تذاكر مديرك كويس تعرف امتي بيكون مزاجه عال و امتي بيكون مش طايق نفسة .... و بكده هتعرف امتي تقدر تتكلم معاه و يسمعك بهدوء . ... و امتي تنسحب في هدوء علشان متجبش لنفسك المشاكل....

6-      خليك بارد ...هادي ... بارد .. هادي ... يعني انت متقدرش تتحكم في الناس لكن تقدر تتحكم في نفسك ...

7-      أعرف حقوقك ... ودا معناه ان من أول يوم ليك في الشركة تطلب الطلبات التالية ( ارقام الهاتف – الاماكن المتاح تواجدك فيها – الكروت الخاصة بيك – نسخة من عقد العمل – قائمة بكل الخدمات المتاحة يعني التامين الصحي و الاجتماعي و كل الحجات دي – اهم من كل دا ..... التوصيف الوظيفي بتاعك محدد فيه بالظبط مين مديرك و ترجع لمين و المهام المطلوبة منك بكل وضوح.

8-      بعد ما تعرف كل المهام بتاعتك ... اتأكد من الأنترنت ان دا الي متعارف عليه في كل الشركات .

9-      حاجه مهمه اوي .... المدير الفاشل .... احاين كثيرة جدا بيكون الدافع لكونك مدير ناجح ... فرصة وجاتلك لحد عندك ... اغتنمها بأه ... كل الحجات الغلط الي مديرك بيعملها تعلمك ايه هي الحجات الصح الي المفروض تتعمل .

بس أسمحلي كمان اطلب منك قبل ما تحكم علي الناس ارجوك حط نفسك مكانهم .... كنت كتير جدا بقول ان مدير تفكيره قديم و مش محدث و كان المفروض يعمل و يسوي ... هو ليه بيجي في التفاهات و يركز أوي .... كلام كتير كنت بقولو لنفسي و ناس كتير مننا بتقوله برضه ... لما أتحطيت في موقع شبه مدير .... فوجأت ان الظروف احيانا كثيرة بتتحكم فيا لدرجه اني ابان امام الموظفين رجعية و متخلفة كمان .... بس المثل الشعبي بيقول ايه ؟؟؟؟؟ الي ميعرفش بيقول عدس..!!!!