ازيك يارشا
انا عرفتك بس من كام يوم من على قهوة نجوم ا ام
وانا بجد معجبة بيكى جدا جدا وبقصة نجاحك وباتمنى ليكى يارب نجاح اكتر واكتر
انا طموحة ونفسى اكبر فى شغلى اكتر
انا شهادتهى دبلوم متوسط ومع ذلك الانجليزى بتاعى كويس الحمد لله لكن برضه مش فظيع
وعندى خبرة حلوة اوى فى شركات الدعاية والاعلان بافهم فى الطباعة وفصل الالوان وكل ما يخص الدعاية واقدر اكون مسئولة عن ادارة شركة كاملة
بس انا مش هينفع افتح شركة لانها غير راس المال لازم اعمل فواتير وحاجات مش هاقدر اعملها الا بمقر
وفى نفس الوقت شهادتى مش بتدخلنى شركة من الشركات الكبيرة لانهم بيطلبوا مؤهلات عليا
وانا محتاجة للشغل بسرعة ومستعدة احسن مهارتى فى اللغة بس لما اشتغل الاول لانى هادفع ده من مرتبى
هل تقدرى تساعدينى او عندك اقتراح ليا بالمناسبة
انا بحب اوى اشتغل مع الناس
واحب ارتب حفلات وانظم مواعيد
ونفسى اجرب اعمل افكار اعلانات انا مبتكرة وخيالى واسع
كمان عندى لباقة وصوتى حلو كمذيعة فى الراديو
وباعرف اكتب كمان اغانى ممكن تتنفع للاعلانات
بس مش عارفة اقدم ده ازاى للشركات
محتاجة نصيحتك
بصي أمكانياتك جميلة اوي .... ومهاراتك كويسة ... بس انا عايزه اكون صريحة معاكي .... موضوع الشهاده دا مهم شويتين ...ثلاثة
فانا بقترح عليكي انك تشتغل في اي شركة مؤقتا .... وفي نفس الوقت قدمي في الجامعة المفتوحة دي الدراسة فيها كل يوم جمعة بس دا هيساعدك جدا حتي انك تقدمي في شركات تانية .... يعني لما تقولي انا اتخرجت من كذا وبحسن من مستوايا باني بدرس في جامعة كذا بيحسن من فرصتك في الألتحاق بالوظيفة الي انتي عايزاها.
و بجانب دا .... ليه مفكرتيش انك تشتغلي في ترتيب الحفلات و الحجات دي دي ملهاش دعوة بالشهادة ... دا غير انك ممكن تعلني لنفسك عن طريق الانترنت تنظيم الحفلات وكده ... و تشتغلي بالقطعة .... هتاخدي وقت شوية لحد ما تعملي لنفسك اسم ... بس ان شاء الله بالاصرار تعملي لنفسك اسم بسرعة ان شاء الله.
دا غير انك ممكن تشتغلي مع اي منظم حفلات كمساعدة ليه ..... ودول هتلاقيهم في الفنادق .... يعني تسألي عن ارقام مسئولي الحفلات و تروحي تقابليهم و تعرضي عليهم افكارك وتشتغلي معاهم وبكده تكتسبي خبرة في المجال الي انتي بتحبية وكمان تكملي دراستك ... ونشوفك ان شاء الله سيدة اعمال قد الدنيا ربنا معاكي
1 التعليقات:
ميرسى يا رشا جداااا جداااااا
انا هاعمل بنصايحك
وبجد باتمنالك التوفيق يارب دايما
إرسال تعليق